![](https://www.kantarawaddytimes.org/wp-content/uploads/2023/02/signal-2023-02-28-120422_003.jpeg)
ကန္တာရဝတီတိုင်း(မ်)
ကရင်နီပြည် ဒီးမော့ဆို နဲ့ ရှမ်း-ကရင်နီနယ်စပ် မိုးဗြဲ၊ ဖယ်ခုံ တွေမှာ စစ်ကောင်စီကနေ လက်နက်ကြီး ပစ်ခတ်မှုတွေ လုပ်ဆောင်ခဲ့ပြီး ဖေဖော်ဝါရီ(၂၇) တစ်ရက်အတွင်း ပြည်သူ (၂)ဦးသေဆုံးခဲ့ပြီး (၆)ဦး ထိခိုက်ဒဏ်ရာရရှိခဲ့ပါတယ်။
ဒီးမော့ဆိုမှာတော့ ယမန်နေ့ ညနေပိုင်းလောက်ကစပြီး ည ၉နာရီအထိ တိုက်ပွဲဖြစ်ပွားမှုမရှိပဲ လက်နက်ကြီး ရမ်းသမ်းပစ်ခတ်ခဲ့ပါတယ်။ လက်နက်ကြီး ထိမှန်မှုကြောင့် ဒီးမော့ဆိုအရှေ့ဖက်ခြမ်းမှာ အသက်(၇၀)အရွယ် အမျိုးသားတစ်ဦး သေဆုံးခဲ့ပြီး အမျိုးသားတစ်ဦးနဲ့ အမျိုးသမီးတစ်ဦးထိခိုက်ဒဏ်ရာရခဲ့ပါတယ်။
အလားတူ ဒီးမော့ဆို အနောက်ဖက်ခြမ်းမှာလည်း ည၈နာရီဝန်းကျင်အချိန် စစ်ရှောင်နေရာတစ်ခု စစ်ရှောင်မိသားစုတစ်ခုရဲ့ တဲအိမ်နား လက်နက်ကြီး ကျရောက်ပေါက်ကွဲခဲ့ပြီး ၂နှစ်ခွဲအရွယ်ရှိ သားမိခင်ဖြစ်တဲ့ အသက် (၃၀)အရွယ်အမျိုးသမီးတစ်ဦး လက်နက်ကြီးစ ထိမှန်သေဆုံးခဲ့ရပါတယ်။
“ စစ်ရှောင်အိမ်တွေဆို ကပ်ရပ် ရှိတယ်လေ အကြားမှာ တည့်တည့်ကျတယ်ပေါ့နော။ ဘေးဖက်က အိမ်ကျတော့ ဖုန်းသွားဆက်မယ်ဆိုပြီး ထွက်သွားတဲ့အချိန်မှာ လက်နက်ကြီးကျတယ်ပေါ့နော။ ဘေးအိမ်တော့ လွတ်သွားတယ်ပေါ့နော။ ဒီဖက် မိသားစုခါကျတော့ အကုန်ထိသွားတာပေါ့နော။ အိမ်ပေါ်တည့်တည့်မဟုတ်ပဲနဲ့ အိမ်ဘေးပေါ့ အိမ်နဲ့ တစ်ပေလောက်ပဲပေါ့။ လက်နက်ကြီးက ၁၂၀ဆိုတော့ အကုန်ကြေသွားတယ်ပေါ့နော။ “ လို့ ဒီးမော့ဆိုမြို့နယ် ပြည်သူ့ကာကွယ်ရေးတပ်(DMO-PDF) က သတင်းနှင့် ပြန်ကြားရေးတာဝန်ရှိသူတစ်ဦးက ပြောပြပါတယ်။
![](https://www.kantarawaddytimes.org/wp-content/uploads/2023/02/signal-2023-02-28-120202_002.jpeg)
တဲအိမ်ပေါ် လက်နက်ကြီးကျရောက်မှုကြောင့် မိသားစု ၃ဦး ထိမှန်ခဲ့ကာ တစ်ဦးသေဆုံးခဲ့တာဖြစ်ပါတယ်။
ခင်ပွန်းဖြစ်သူ ဘယ်ဖက်လက်မောင်းကျိုးကြေတဲ့ ပြင်းထန်ဒဏ်ရာနဲ့ ညီမဖြစ်သူလည်း တင်ပါးဆုံမှာ ပြင်းထန်ဒဏ်ရာရခဲ့ပြီး ၂ဦးစလုံး အသက်အန္တာရယ်စိုးရိမ်ရတယ်လို့ သူက ဆက်ပြောပြပါတယ်။
ယမန်နေ့ညက ဒီးမော့ဆိုအနောက်ဖက်ခြမ်းမှာ လက်နက်ကြီးခြောက်လုံး ကျရောက်ပေါက်ကွဲခဲ့ပြီး မပေါက်ကွဲသေးတာတွေလည်း ရှိနိုင်တယ်လို့ DMO-PDF ပြန်ကြားရေးတာဝန်ရှိသူတစ်ဦးက ဆိုပါတယ်။
ဒါ့အပြင် ဖယ်ခုံအခြေစိုက် စစ်ကောင်စီတပ်ကနေပြီး လက်နက်ကြီး ပစ်ခတ်မှုကြောင့် မိုးဗြဲ၊ ဖယ်ခုံ အနောက်ဖက်ခြမ်း ကျေးရွာတွေအတွင်း လက်နက်ကြီး ကျရောက်ခဲ့ပြီး အသက် (၂၇)နှစ်အမျိုးသားတစ်ဦးနဲ့ အသက်(၄၇) အမျိုးသမီးတစ်ဦး ထိခိုက်ဒဏ်ရာရခဲ့တယ်လို့ မိုးဗြဲပြည်သူ့ကာကွယ်ရေးတပ်က ဒီကနေ့(ဖေဖော်ဝါရီ ၂၈ရက်) မှာ သတင်းထုတ်ပြန်ပါတယ်။
အခုလို စစ်ရှောင်ရှိရာ အရပ်သားပြည်သူရှိရာနေရာတွေကို လက်နက်ကြီးပစ်ခတ်တာတွေက စစ်ကောင်စီကနေ ရည်ရွယ်ချက်ရှိရှိ ပစ်မှတ်ထား တိုက်ခိုက်နေတာဖြစ်တယ်လို့ ဒေသခံကာကွယ်ရေးတပ်ဖွဲ့တွေက ဆိုကြပါတယ်။
![](https://www.kantarawaddytimes.org/wp-content/uploads/2023/02/signal-2023-02-28-120202_003.jpeg)