ဘောလခဲမြို့နယ် စောလုံကျေးရွာ လေကြောင်းတိုက်ခိုက်ခံရ၊ အမျိုးသမီးတစ်ဦးသေဆုံးပြီး လူထိခိုက်မှုရှိ

ကန္တာရဝတီတိုင်း(မ်)

ကရင်နီပြည်နယ် ဘောလခဲမြို့နယ်အတွင်းရှိ စောလုံကျေးရွာကို ဒီကနေ့ မေလ ၁၇ ရက်နေ့ မနက်စော ၄နာရီဝန်းကျင်မှာ တိုက်ပွဲဖြစ်ပွားခြင်းမရှိဘဲ စစ်ကောင်စီရဲ့ လေကြောင်းအသုံးပြုတိုက်ခိုက်ခဲ့ပြီး အမျိုးသမီးတစ်ဦးသေဆုံးခဲ့ပါတယ်။

ဂျက်ဖိုက်တာ နဲ့ ဗုံးကျဲခံရမှုကြောင့် အသက် ၁၇ နှစ်အရွယ် အမျိုးသမီး သေဆုံးခဲ့ရပြီး၊ သက်ကြီးပိုင်း အမျိုးသား ၄ ဦးထိခိုက်ဒဏ်ရာရရှိခဲ့သလို ကျေးရွာဆေးပေးခန်း အဆောက်အအုံနှစ်လုံး၊ လူနေအိမ် ၆လုံး ပျက်စီးခဲ့ရတယ်လို့ ဘောလခဲ PDF က ဒီကနေ့မှာ သတင်းထုတ်ပြန်ပါတယ်။

ဒါ့အပြင် လေကြောင်း ဗုံးကျဲတိုက်ခိုက်မှုကြောင့် ဘုန်ကြီးကျောင်းနဲ့ သောက်သုံးရေကန်လည်း ပျက်စီးခဲ့ပြီး တိရိစ္ဆာန်တချို့လည်း သေဆုံးခဲ့ရပါတယ်။

ပြီးခဲ့တဲ့ မတ်လ ၂၃ရက်နေ့ကလည်း တိုက်ပွဲဖြစ်ပွားခြင်းမရှိတဲ့ ဘောလခဲမြို့နယ် ဝမ်ဗလကျေးရွာအနီးမှာ ဂျက်လေယာဉ်တစ်စီးနဲ့ ၅ကြိမ် လာရောက်ပစ်ခတ်ခဲ့ပြီး သစ်လုပ်ငန်းလုပ်ကိုင်နေတဲ့ အရပ်သား ၅ ဦး ထိခိုက်ဒဏ်ရာရပြီး ၃ ဦးသေဆုံးသွားခဲ့ရပါတယ်။

မေလအစောပိုင်းကစ ဘောလခဲမြို့တွင်းက စစ်ကောင်စီတပ်စွဲရာနေရာတချို့ကို ဘောလခဲ PDF ပူးပေါင်းတပ်ဖွဲ့က ဝင်ရောက်တိုက်ခိုက်တာတွေရှိခဲ့ပါတယ်။ ဒါ့အပြင် ဘောလခဲ (၁၂)မိုင်ကုန်း၊ ဝမ်မလန်းကျေးရွာဖက်ကို စစ်ကြောင်းထိုးတဲ့ စစ်ကောင်စီတပ်ကို ကရင်နီတပ်မတော်(KA)၊ KNDF၊ ဘောလခဲ PDF ပူးပေါင်းတပ်တို့ တိုက်ခိုက်ခဲ့တာကြောင့် စစ်ကောင်စီဖက်က အနည်းဆုံး ၅ဦးသေဆုံးပြီး လက်နက်ခဲယမ်းတချို့လည်း သိမ်းဆည်းရမိခဲ့ပါတယ်။

ဘောလခဲမြို့နယ်အတွင်းကို စစ်ကောင်စီတပ်ကနေ လေကြောင်းဗုံးကျဲမှု ၃ ကြိမ်ခန့် ပြုလုပ်ခဲ့ပြီး လူထုတွေအနေနဲ့ လေကြောင်းရန်ကာကွယ်ဖို့ ပြင်ဆင်သင့်ပြီလို့ ဘောလခဲ PDF က ထုတ်ပြန်ထားပါတယ်။ ဘောလခဲမြို့နယ်အတွင်း ထိတွေ့တိုက်ပွဲမှုတွေမှာ စစ်ကောင်စီတပ်က လေကြောင်းအသုံးပြုတိုက်ခိုက်နေတာဖြစ်ပါတယ်။

ယခုရက်ပိုင်းမှာလည်း ဒီးမော့ဆိုမြို့နယ်အရှေ့ဘက်ခြမ်းမှာ စစ်ကောင်စီတပ်နဲ့ ပူးပေါင်းတပ်ဖွဲ့တို့ တိုက်ပွဲပြင်းထန်နေပြီး လေကြောင်းသုံးတိုက်ခိုက်မှုတွေ ပြုလုပ်နေတယ်လို့ သိရပါတယ်။