[the_ad_placement id=”content-1″]ထျိုးမြာ
ကယားပြည်နယ်တွင် ဆိုင်ကယ်ခိုးရန် ကြိုးပမ်းသူ လူ ၁ ဦးအား ရွာသားများက အုပ်စုလိုက်ဝိုင်းရိုက်ခဲ့သည့်အတွက် သေဆုံးမှုဖြစ်ပွားခဲ့ပြီး ကျူးလွန်ခဲ့သူ ရာအိမ်မှူးအပါအဝင် ရွာသား ၂၆ ဦးကို ရာဇာသတ်ကြီးပုဒ်မဖြင့် အရေးယူရန် ဆောင်ရွက်နေသည်။
ကျူးလွန်ခဲ့သူ ၂၆ ဦးကို ဖေဖေါ်ဝါရီ ၄ ရက်နေ့တွင် လွိုင်ကော်ရဲစခန်းက အမှုဖွင့်ကာ ခေါ်ယူစစ်ဆေးမှုများ ပြုလုပ်နေသည်။ ဆိုင်ကယ်ခိုးယူရန် ကြိုးစားသူကို မင်္ဂလာဆောင်၌ ချက်ပြုတ်နေကြသော လူငယ်များမှ ဖမ်းဆီးပြီး ဝိုင်းဝန်းထိုးကြိတ်ရာက ဆေးရုံတွင် သေဆုံးသွားကြောင်း ရဲမှတ်တမ်းတွင် ဖေါ်ပြထားသည်။
ဖေဖော်ဝါရီလ ၃ ရက်နေ့ နေ့လည် ၁၂ နာရီအချိန်ခန့်တွင် နွားလဝိုးကျေးရွာအုပ်စု၊ ကယန်းကြခူကျေးရွာ ဦးထွန်းရယ်၏ နေအိမ်တွင် မင်္ဂလာဆောင်ပွဲပြုလုပ်နေစဉ် မင်္ဂလာဆောင်နေရာတွင် လူ ၁ ဦးက လာရောက်ခိုးယူရန် ကြိုးပမ်းနေစဉ် ပွဲတော်အတွက် ချက်ပြုတ်နေကြသော ရွာသားများက တွေ့ရှိခဲ့ကြောင်း သိရသည်။
ထို့နောက် ရွာသားများက ဆိုင်ကယ်ခိုးရန်ကြိုးစားသူအား လိုက်လံဖမ်းဆီးရာ အဆိုပါ လူငယ်က ပြန်လည်ခုခံသဖြင့် ဝိုင်းဝန်းထိုးကြိတ်ခဲ့သည်။
ထိုးကြိတ်ခံရသူအား ကြိုးတုတ်ထားရာ သတိလစ်သွားသဖြင့် လွိုင်ကော်ပြည့်သူ့ဆေးရုံသို့ပို့ဆောင်ပြီး ဆေးကုသပေးခဲ့သော်လည်း ဖေဖော်ဝါရီလ ၄ ရက်နေ့ နေ့လည်အချိန်တွင် ရရှိသော ဒဏ်ရာများဖြင့် ဆေးရုံ၌ သေဆုံးသွားခဲ့ခြင်းဖြစ်သည်။
သေဆုံးသူမှာ ဧရာဝတီတိုင်းဒေသကြီးတွင် နေထိုင်သူမောင်အောင်မြတ်ချို ဖြစ်သည်။ မောင်အောင်မြတ်ချိုသည် အခင်းဖြစ်ရာမှ ရရှိသော လည်ပင်းညိုမဲဒဏ်ရာ၊ နှာခေါင်းနှင့် နားတို့တွင် သွေးထွက်ဒဏ်ရာ၊ ရင်ဘတ်ပွန်းပဲဒဏ်ရာများဖြင့် လွိုင်ကော်ပြည်သူ့ဆေးရုံကြီးတွင် ကုသမှုခံယူနေစဉ် သေဆုံးသွားသောကြောင့် အမှုအား ရာဇသတ်ကြီးပုဒ်မ ၃၂၅/ ၃၄ မှ ရာဇသတ်ကြီးပုဒ်မ ၃၀၂/ ၃၄သို့ ပြောင်းလဲစစ်ဆေးလျက်ရှိပြီး အမှုစစ်ရဲအုပ်တင်မောင်လတ်မှ ဒုရဲမှူးဝင်းဌေးအား လွဲပြောင်းစစ်ဆေးရန် စီစဉ်ဆောင်ရွက်လျက်ရှိကြောင်း လွိုင်ကော်မြို့မရဲစခန်းထံမှ သိရသည်။
