ကန္တာရဝတီတိုင်း(မ်)
ရှမ်း-ကရင်နီနယ်စပ် မိုးဗြဲမြို့မှာ ယမန်နေ့ ဖေဖော်ဝါရီလ ၅ ရက်နေ့က စစ်ကောင်စီက ကင်းထောက်ယာဥ်နဲ့ မီးလောင်ဗုံးကြဲတာကြောင့် မြို့ထဲက သစ်ယာကုန်းရပ်ကွက်မှာရှိတဲ့ နေအိမ်တချို့မီးလောင်ပျက်စီးမှုရှိတယ်လို့ ဒေသခံတွေက ပြောပါတယ်။
ဒါ့အပြင် ယမန်နေ့မှာ စစ်ကောင်စီနဲ့ တော်လှန်ရေးတပ်ဖွဲ့တွေကြား တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီက လေကြောင်းနဲ့ လက်နက်ကြီးပစ်ကူ အသုံးပြုပြီး တိုက်ခိုက်ခဲ့တယ်လို့ KNDF သတင်းနဲ့ ပြန်ကြားရေးတာဝန်ခံ တာအယ်စိုးက ပြောပါတယ်။
“မိုးဗြဲမြို့မှာ ၅ ရက်နေ့မှာ တိုက်ပွဲအတော်လေးပြင်းထန်ခဲ့တယ်ပေါ့။ စစ်ကောင်စီက လေကြောင်းတိုက်ခိုက်မှုတွေ အများအပြားလုပ်ခဲ့တယ်။ ထောက်ပို့ Y 12 လေယာဥ်နဲ့ ဗုံးကြဲချတာတွေ မီးလောင်ဗုံးသုံးတာတွေ ပြုလုပ်ခဲ့တယ်” လို့ တာအယ်စိုးက ပြောပါတယ်။
၂၀၂၃ခုနှစ်က ဖြစ်ပွားခဲ့တဲ့ တစ်လေးလုံး စစ်ဆင်ရေးကြောင့် မိုးဗြဲဒေသခံတွေဟာ ဘေးလွတ်ရာကိုပြောင်းရွေ့နေထိုင်ခဲ့တာကြောင့် နေအိမ်မီးလောင်ပျက်စီးမှုရှိခဲ့တဲ့ သစ်ယာကုန်းရပ်ကွက်မှာ လူနေထိုင်မှုမရှိဘူးလို့ ပြောပါတယ်။
တစ်ရက်ထဲမှာပဲ တိုက်ပွဲဖြစ်ပွားခြင်းမရှိတဲ့ မိုးဗြဲမြို့နဲ့ ၂မိုင်ဝန်းကျင်ဝေးတဲ့ ကုန်းဆုံကျေးရွာကိုလည်း စစ်ကောင်စီက လေကြောင်းတိုက်ခိုက်မှုပြုလုပ်ခဲ့ပြီး အထိခိုက်တော့ မရှိဘူးလို့ မြိုးဗြဲဒေသခံတစ်ဦးကပြောပါတယ်။
“မနေ့ည ၇ နာရီဝန်းကျင်လည်း လေယာဥ်နဲ့ လာကြဲတယ်။ ကုန်းဆုံရွာနားဖက် လည်းကြဲတယ်လို့ပြောတယ်။ မနေ့ကတော့ တိုက်ပွဲတစ်နေကုန်။ ဒီရက်တော့ သိပ်မကြားတော့ဘူး ” လို့ ဒေသခံတစ်ဦးက ပြောပါတယ်။
တစ်နှစ်ကျော်ကြာ တော်လှန်ရေးတပ်ဖွဲ့တွေ ထိန်းချုပ်ထားတဲ့ မိုးဗြဲမြို့ကို စစ်ကောင်စီရဲ့ ခမရ (၄၂၂) တပ်ကနေ စစ်ကြောင်းထိုးလာတာကြောင့် တော်လှန်ရေးတပ်ဖွဲ့နဲ့ တိုက်ပွဲဖြစ်ပွားနေတာ ၃လဝန်းကျင်ရှိနေပါပြီ။ ယမန်နေ့ဖြစ်ပွားတဲ့ တိုက်ပွဲအတွင်း နှစ်ဖက် အကျအဆုံး၊ ထိခိုက်ဒဏ်ရာရရှိမှုတွေလည်း ရှိနေတယ်လို့ သိရပါတယ်။ တိုက်ပွဲအခြေအနေနဲ့ပတ်သက်ပြီး တော်လှန်ရေးတပ်ဖွဲ့တွေက တစ်စုံတစ်ရာထုတ်ပြန်ထားခြင်း မရှိသေးပါဘူး။
