မူဖိလစ်စတာ / ကန္တာရဝတီတိုင်း (မ်)
မိုးဗြဲမြို့က ရှမ်းပြည်နယ်တောင်ပိုင်း တောင်ကြီးမြို့ရဲ့ ၉၁ မိုင် အကွာမှာ တည်ရှိပါတယ်။ တောင်ကြီးခရိုင် ဖယ်ခုံမြို့နယ်ထဲက ရှမ်း-ကရင်နီ နယ်စပ် စီးပွားရေးအချက်အချာကျတဲ့မြို့လည်း ဖြစ်ပါတယ်။
ရှမ်းပြည်နယ်၊ တောင်ကြီးမြို့ရဲ့ ပြည်ထောင်စုလမ်းမကြီးက မိုးဗြဲမြို့ကိုဖြတ်ပြီး ကရင်နီပြည်၊ လွိုင်ကော်မြို့ကို သွယ်တန်းထားတာ ဖြစ်ပါတယ်။ မိုးဗြဲမြို့က ဧရိယာစတုရန်းမိုင် ၆၆.၆၆ ရှိပြီး ၂၀၁၉ သန်းခေါင်စာရင်းအရ လူဦးရေ သုံးသောင်းနီးပါး (၂၈၂၈၇ ဦး) ရှိပါတယ်။
မိုးဗြဲမြို့ရဲ့ ပြည်ထောင်စုလမ်းမအတိုင်း အရှေ့တောင်ဖက် ၁၅ မိုင်အကွာမှာ ကရင်နီပြည်ရဲ့ မြို့တော်ဖြစ်တဲ့ လွိုင်ကော်မြို့ရှိပြီး၊ တောင်ဖက် ၁၄ မိုင်အကွာမှာ ကရင်နီပြည်ရဲ့ ဒုတိယမြို့တော်ဖြစ်တဲ့ ဒီးမော့ဆိုမြို့ တည်ရှိပါတယ်။
မိုးဗြဲမြို့က ဘာလို့ အရေးပါလဲ
လက်ရှိမှာတော့ မိုးဗြဲမြို့မှာ စစ်ကောင်စီတပ်နဲ့ တော်လှန်ရေးတပ်ဖွဲ့တွေ နေ့စဉ်နဲ့အမျှ တိုက်ပွဲတွေ ဖြစ်ပွားနေပါတယ်။
ရှမ်းပြည်နယ်ကနေ စီးဝင်လာတဲ့ စစ်ကောင်စီလမ်းကြောင်းတွေကို တော်လှန်ရေးတပ်ဖွဲ့တွေက မိုးဗြဲမြို့ကနေတဆင့် ပိတ်ဆို့တားဆီးနေတာဖြစ်တယ်လို့ ကရင်နီအမျိုးသားများကာကွယ်ရေးတပ် KNDF သတင်းနှင့်ပြန်ကြားရေးတာဝန်ခံ တာအယ်စိုးက ပြောပါတယ်။
စစ်ရေးအရ နှစ်ဦးနှစ်ဖက်အတွက် အရေးပါတဲ့ ရှမ်း – ကရင်နီနယ်စပ်မြို့ဖြစ်တဲ့ မိုးဗြဲမြို့ကို စစ်ကောင်စီနဲ့အတူ လက်အောက်ခံတပ်တွေနဲ့ တော်လှန်ရေးတပ်တို့က လက်မလွှတ်ရရေး တိုက်ပွဲဆက်တိုက်ဆင်နွှဲနေကြပါတယ်။
၂၀၂၄ ခုနှစ် စက်တင်ဘာလကစလို့ မိုးဗြဲမြို့မှာ နှစ်ဖက်တိုက်ပွဲ တဖန်ပြန်လည်ဖြစ်ပွားခဲ့ပြီး အခုဆို ၅ လ ကြာနေပါပြီ။ ဒါပေမဲ့ လက်ရှိမှာ မိုးဗြဲမြို့ကို တော်လှန်ရေးတပ်ဖက်က ထိန်းချုပ်ထားဆဲပါ။
“စစ်ကောင်စီကတော့ မိုးဗြဲကနေအခြေခံပြီးတော့မှ ဒီးမော့ဆို၊ ဖရူဆိုတို့ကို စစ်ကြောင်းထိုးတဲ့ လမ်းကြောင်းပွင့်သွားနိုင်တယ်။ မိုးဗြဲရယ် လွိုင်ကော်ရယ်ကို စစ်ကြောင်းဆက်ပြီးတော့မှ ထောက်ပို့လမ်းကြောင်းပိုပြီးတော့မှ ဖြောင့်ဖြူးတာမျိုးဖြစ်နိုင်တယ်” လို့ တာအယ်စိုးက ပြောပါတယ်။
အငြိမ်းမသတ်နိုင်တဲ့ မိုးဗြဲတိုက်ပွဲ
၂၀၂၁ မေ ၂၃ မှာစတဲ့ မိုးဗြဲမြို့မရဲစခန်းတိုက်ပွဲ အရှိန်နဲ့အတူ ဒီနှစ်သစ် ၂၀၂၅ အထိ မိုးဗြဲတိုက်ပွဲကတော့ ဖြစ်လိုက်ရပ်လိုက်နဲ့ပါ။
၁၁ ရက် ၁၁ လ ၂၀၂၃ ခုနှစ် မှာစတင်ခဲ့တဲ့ ၁ လေးလုံးစစ်ဆင်ရေးမှာလည်း မိုးဗြဲ-လွိုင်ကော်-ဒီးမော့ဆို တို့ကိုဆက်သွယ်ထားတဲ့ အဝင်အထွက်လမ်းမတွေပေါ်မှာရှိတဲ့ ဝါရီဆူးပလိုင်၊ နန်းစံခမ်း၊ ဘုရားဖြူ၊ ညောင်ဝိုင်း၊ ဝါရီကောခူ၊ ရေယိုနဲ့ ချိကယ်တို့မှာ ၂ နှစ်ကျော်ကြာ စခန်းချတပ်စွဲခဲ့တဲ့ စစ်ကောင်စီတပ်စခန်းတွေကို တော်လှန်ရေးတပ်တွေက သိမ်းပိုက်နိုင်ခဲ့ပါတယ်။
၁ လေးလုံးစစ်ဆင်ရေးမှာပဲ မိုးဗြဲမြို့တည်ရှိရာ ဖယ်ခုံမြို့နယ်အတွင်းက စစ်ကောင်စီတပ်စခန်း ၁၇ ခုကို တော်လှန်ရေးတပ်ပေါင်းစုတို့က သိမ်းပိုက်နိုင်ခဲ့ပေမဲ့ ကျန်ရှိနေတဲ့တပ်စခန်းတွေလည်းရှိနေဆဲပါပဲ။
“ဖယ်ခုံမြို့နယ်ထဲက သိမ်းပိုက်ထားတဲ့ စစ်ကောင်စီတပ်စခန်းတော်တော်များများကို တော်လှန်ရေးတပ်ဖွဲ့တွေကပဲ ပြန်ပြီးတော့ နေရာယူထားတယ်။” လို့ တာအယ်စိုးက ဖယ်ခုံမြို့နယ်ရဲ့ လက်ရှိအခြေနေကို ပြောပြပါတယ်။
၁ လေးလုံးစစ်ဆင်ရေးအလွန် ၂၀၂၄ ခုနှစ် ဧပြီလထဲမှာ မိုးဗြဲအခြေစိုက် ခမရ ၄၂၂ တပ်ကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ပေမဲ့ သိမ်းပိုက်ဖို့ မအောင်မြင်ခဲ့ပါဘူး။
မိုးဗြဲမြို့ခံလူထုတွေကတော့ ၁ လေးလုံးစစ်ဆင်ရေးကစလို့ ဘေးလွတ်ရာကိုတိမ်းရှောင်နေခဲ့ကြတာ ယနေ့အချိန်ထိပါ။ ဒါပေမဲ့ အရပ်သားတွေ တိမ်းရှောင်ရာ စစ်ရှောင်စခန်း ၊ ကျေးရွာတွေကို ၂၀၂၄ ခုနှစ်အတွင်း စစ်ကောင်စီက တနေ့တခြား လေကြောင်းတိုက်ခိုက်မှုတွေ ပိုမိုလုပ်ဆောင်လာနေတယ်လို့ ဒေသခံတွေက ပြောပါတယ်။
ထူးခြားလာတဲ့ မိုးဗြဲတိုက်ပွဲ
၂၀၂၄ ခုနှစ် သြဂုတ်လမှာ အင်အား ၃၀၀ ပါတဲ့ စစ်ကောင်စီနဲ့လက်အောက်ခံ ပအိုဝ်းပြည်သူ့စစ်တို့က ရှမ်းပြည်နယ်တောင်ပိုင်း ပင်လောင်းမြို့ကနေ ဖယ်ခုံမြို့နယ်ကို ထိုးစစ်ဆင်လာပါတယ်။ အဲဒီစစ်ကြောင်းကို တော်လှန်ရေးပူးပေါင်းတပ်ဖွဲ့တွေက ခုခံတိုက်ခိုက်ခဲ့ပေမဲ့ စက်တင်ဘာလမှာ စစ်ကြောင်းက မိုးဗြဲမြို့ကို ရောက်လာခဲ့ပါတယ်။
“စစ်ကောင်စီရဲ့ စစ်ကြောင်းတွေကို ဒီးမော့ဆိုဖက်ကိုထပ်ပြီးတော့ မရောက်လာအောင်၊ လွိုင်ကော်ရယ် မိုးဗြဲရယ်ကို စစ်ကောင်စီကထောက်ပို့လမ်းကြောင်းတွေ ထပ်ပြီးတော့မတည်ဆောက်နိုင်အောင် ကျနော်တို့ တော်လှန်ရေးတပ်ဖွဲ့တွေက ဟန့်တားနေတာဖြစ်တယ်။” လို့ တာအယ်စိုးက မိုးဗြဲရဲ့ လက်ရှိအခြေနေကို ဆက်ပြီးပြောပြပါတယ်။
ဓာတုလက်နက်များအသုံးပြုခြင်း
၅ လကြာပြီဖြစ်လာတဲ့ တိုက်ပွဲအတွင်းမှာ အရင်ကနဲ့မတူဘဲ စစ်ကောင်စီက မီးလောင်ဗုံး၊ အဆိပ်ငွေ့ဗုံးတွေကို ခပ်စိပ်စိပ်အသုံးပြုလာတာကိုလည်း တွေ့ရတယ်လို့ မြေပြင် တော်လှန်ရေးတပ်ဖွဲ့တွေက ပြောပါတယ်။
၂၀၂၄ ခုနှစ် ဒီဇင်ဘာလ ၇ ရက်နေ့နဲ့ ၈ ရက်နေ့မှာ မိုးဗြဲအခြေစိုက် ခမရ (၄၂၂) တပ်က ဒရုန်းဗုံးနဲ့အတူ S-PHOS ( အက်စ်ဖော့စ် ) ၅၆၀ အဆိပ်ငွေ့ပြားတွေကို သုံးပြီးတိုက်ခိုက်လာတာကို တော်လှန်ရေး ပူးပေါင်းတပ်ဖွဲ့က သက်သေနှင့်တကွ ရှာဖွေတွေ့ရှိထားခဲ့ပါတယ်။
မိုးဗြဲတိုက်ပွဲမှာပဲ စစ်ကောင်စီက အရင်ကနဲ့မတူဘဲ လက်နက်ကြီး၊ လေယာဥ်နဲ့ပါ အဆိပ်ငွေ့ဗုံး တွဲသုံးလာတာကိုတွေ့ရတယ်လို့ တော်လှန်ရေးတပ်ဖွဲ့တွေက ပြောပါတယ်။
စစ်ကောင်စီရဲ့ မီးလောင်ဗုံးကြောင့် ၂၀၂၅ ခုနှစ် ဖေဖော်ဝါရီလ တလတည်းမှာပဲ မိုးဗြဲမြို့တွင်းရှိ နေအိမ် အလုံး ၃၀ ဝန်းကျင် မီးလောင်ပျက်စီးခဲ့တယ်လို့ ကရင်နီလူ့အခွင့်အရေးအဖွဲ့ တည်ထောင်သူ ဦးဗညားက ပြောပါတယ်။
ကန္တာရဝတီတိုင်း (မ်) ရဲ့ လက်လှမ်းမီသမျှအချက်အလက်အရ ၂၀၂၄ ခုနှစ် ဧပြီလကနေ ၂၀၂၅ ခုနှစ် ဖေဖော်ဝါရီလအထိ စစ်ကောင်စီရဲ့ လေကြောင်းတိုက်ခိုက်မှု၊ လက်နက်ကြီးပစ်ခတ်မှု၊ သေနတ်ဖြင့် ပစ်သတ်မှုတို့ကြောင့် မိုးဗြဲမြို့တည်ရှိရာ ဖယ်ခုံမြို့နယ်မှာ အရပ်သား ၄၇ ဦး သေဆုံးခဲ့ပါတယ်။
စစ်ကောင်စီရဲ့ တပ်သားသစ်များ အလင်းဝင်လာခြင်း
မိုးဗြဲတိုက်ပွဲအတွင်းမှာ နှစ်ဖက်ထိခိုက်ကျဆုံးမှုတွေ ရှိနေပေမဲ့ စာရင်းအတိအကျကိုတော့ မသိရပါဘူး။
မိုးဗြဲတိုက်ပွဲမှာ စစ်မှုထမ်းသင်တန်းဆင်း တပ်သားတွေ ပါဝင်တိုက်ခိုက်မှုတွေရှိလာသလို အဆိုပါ တပ်သားသစ်တွေရဲ့ ဘက်ပြောင်းခိုလှုံမှုတွေလည်း ခပ်စိပ်စိပ်တွေ့လာရပါတယ်။
စစ်မှုထမ်းဥပဒေ အသက်ဝင်ပြီးနောက် ကရင်နီအမျိုးသားများကာကွယ်ရေးတပ် KNDF ထံ အလင်းဝင်လာတဲ့ စစ်ကောင်စီတပ်သား အယောက် ၁၀၀ ကျော်ရှိ တယ်လို့လည်း KNDF က ပြောပါတယ်။
ကရင်နီပြည်တခုလုံးအတိုင်းအတာနဲ့ကြည့်မယ်ဆိုရင် စစ်ကောင်စီထိန်းချုပ်နယ်မြေက လွိုင်ကော်မြို့ပေါ်နဲ့ ဘောလခဲမြို့ပေါ်သာ ကျန်ပါတယ်။
ဒါ့အပြင် လွိုင်ကော်ဒေသကွပ်ကဲရေးစစ်ဌာနချုပ် ဒကစ ရဲ့ လက်အောက်ခံတပ်ရင်းတွေဖြစ်တဲ့ ခလရ (၅၄) လွိုင်ကော်၊ ခမရ (၅၃၀)လွိုင်လင်လေး၊ ခလရ (၇၂ ) လောပိတ၊ ခမရ (၄၂၂) မိုးဗြဲ၊ ခလရ (၁၃၄) ဖားဆောင်း၊ ခလရ (၁၃၅) ဖားဆောင်း၊ ခမရ (၄၂၈) ဖရူဆို၊ ခမရ (၅၃၁) ဖရူဆို နဲ့ ခမရ (၄၂၇) ဒီးမော့ဆို၊ ခလရ ( ၁၀၂) ဒီးမော့ဆို တို့မှာလည်း စစ်ကောင်စီတပ်သားတွေ တပ်စွဲနေဆဲဖြစ်ပါတယ်။
စစ်ရေးအရ နှစ်ဦးနှစ်ဖက်အတွက် အရေးပါတဲ့ မိုးဗြဲမြို့ကို စစ်ကောင်စီက ပြန်လည်သိမ်းယူနိုင်ခဲ့ရင် စစ်ထောက်ပို့လမ်းကြောင်းတွေက မိုးဗြဲကနေ လွိုင်ကော်၊ ဒီးမော့ဆို၊ ဖရူဆို၊ ဘောလခဲ၊ ဖားဆောင်း စတဲ့ အခြေစိုက်စခန်းတွေအထိကို အဆင့်ဆင့် အလွယ်တကူထိုးဖောက်ဝင်ရောက်လာနိုင်တဲ့ အခြေအနေ ဖြစ်လာနိုင်ပါတယ်။
