ကန္တာရဝတီတိုင်း(မ်)
စစ်ရှောင်စခန်းကနေ ကျေးရွာဆီကို လူနာ ထမ်းပြီး ပြန်လာနေကြတဲ့ ဖရူဆို စစ်ရှောင်တချို့ ကို တွေ့မြင်နေရတာပဲ ဖြစ်ပါတယ်။
စစ်ရှောင်စခန်းမှာ နေထိုင်ရင်း ဖျားနာနေတဲ့ အသက် ၆၀ ကျော်အရွယ် အဖိုး ဦးမီရယ် ကို ထမ်းပြန်ကြတာဖြစ်ပြီး ခရီးလမ်းတစ်ဝက်မှာ ဆုံးပါးသွားခဲ့ရတယ်လို့ စစ်ရှောင်တစ်ဦးက ပြောပြပါတယ်။ သူကတော့ သက်ကြီးရောဂါ ခံစားနေရတာဖြစ်ပါတယ်။
“ ကျနော်တို့ စစ်ရှောင်မှာနေကြတာ။ သူက ရွာမှာပဲ ပြန်ဆုံးချင်တယ် အဲလိုပြောတော့ ကျနော်တို့ သူ့ကိုထမ်းပြန်ရင်း သူ တောင်ပေါ်မှာပဲဆုံးသွားတယ်။ ပြီးတော့ ရွာမှာ ပြန်ထားတယ်။ လမ်းမရှိဘူးလေ။ တောင်တက်ရတာ နှစ်လုံး၊ သုံးလုံး တောင်ပြီး တစ်ခါပြန်ဆင်း။ ရွာထဲ ပြန်ထမ်းပြန်ရတာပေါ့ သူဆုံးပြီးတော့။ ဆိုင်ကယ်လမ်း၊ ကားလမ်းလည်း မရှိဘူး တောလမ်းပဲပေါ့။ “
ပရေဆိုလဲစစ်ရှောင်စခန်းမှာ နေထိုင်တဲ့စစ်ရှောင်တွေ ဖြစ်ပြီး ကျေးရွာအထိ ခြေကျင်နဲ့ ၃နာရီခွဲစာလောက် သွားရတယ်လို့ သိရပါတယ်။ ဇန်နဝါရီလ နောက်ဆုံးပတ်အတွင်း ကဖြစ်ပွားခဲ့တာဖြစ်ပါတယ်။
“ ကျနော်တို့ ရွာကပဲ ဆိုလို့ရှိရင် လက်ရှိတစ်ယောက်ပါပါ စစ်ရှောင်ရင်း သုံးယောက်ဆုံးသွားပြီပေါ့။ ဖျားနာရင်းဆုံးသွားကြတာပေါ့။ ရောဂါ အခြေအနေ အတိကျတော့ မသိရဘူးပေါ့။ ခေါင်းမူး၊ လည်ချောင်းနာ ပြီး အေးတော့ အဲ့လိုဖြစ်သွားကြတာပေါ့။ စစ်ရှောင်စခန်းမှာ တစ်ယောက်ဆုံးတယ်။ တစ်ယောက်က ရွာထဲ ထမ်းပြန်ပြီး နောက်တစ်ညမှာဆုံးတယ်။
ကျေးရွာအနီးနားတွေမှာ စစ်ကောင်စီတပ်တွေ ရှိနေတဲ့အတွက် ဆုံးပါးသွားတဲ့ သူတွေဆိုရင် ကျေးရွာအထိ ခဏတဖြုတ်ပြန် သင်္ဂြိုလ်ပြီး စစ်ရှောင်ဆီ ပြန်ထွက်ခွာသွားရပြန်ပါတယ်။
အဲဒီစစ်ရှောင်စခန်းမှာဆိုရင် နယ်လှည့်ကုသပေးတာကိုပဲ အားကိုးနေရပြီး ဆေးဝါးကုသမှု လုံလောက်မှု မရှိတဲ့ နေရာဖြစ်ပါတယ်။
