ကန္တာရဝတီတိုင်း ( မ် )
ကရင်နီပြည် ၊ ဒီးမော့ဆိုမြို့နယ် အနောက်ဖက်ခြမ်းမှာ ဆေးဝါးပြတ်လပ်မှုရှိတာ ကြာမြှင့်နေပြီး ဒေသခံတွေအပါအဝင် စစ်ဘေးရှောင်တွေဟာ ဖျားနာပါက ဆေးဆိုင်မှာ ဆေးဝါးဝယ်ယူတဲ့အခါ အကန့်အသတ်နဲ့သာ ဝယ်ယူနေကြရတယ်လို့ ဆိုပါတယ်။
လိုအပ်တဲ့ဆေးဝါးကို လိုသလောက်မရတဲ့အခါမျိုးမှာ အခက်အခဲရှိတယ်လို့ စစ်ရှောင်တွေကို ဆေးကုသမှုဆောင်ရွက်ပေးနေတဲ့ ဆရာမတစ်ဦးက အခုလိုပြောပါတယ်။
“ကျမတို့ ဆေးသွားဝယ်ရင်လည်း မရတာရှိတယ်။ ရရင်လည်း စကေးနဲ့ပဲရမယ်။ ဥပမာ – တစ်ဖာရှိရင် တစ်ယောက်ဆို ကျမတို့က ကျမတို့သုံးယောက်တူတူသွားဝယ်တော့ ကျမတို့ကို တစ်ယောက်သုံးလုံးနှုန်း ၊ သုံးပုံမှာ တစ်ပုံပဲရခွင့်ရှိတယ်ပေါ့နော” လို့ သူက ဆိုပါတယ်။
ဆေးဝါးအလုံအလောက်မရှိတာကြောင့် ဆေးလာကုတဲ့ စစ်ဘေးရှောင်တွေကို ဆေးအလုံအလောက်မပေးနိုင်ဘဲ သုံးခါအပြတ်သောက်ရမဲ့ဆေးတွေကို တစ်ခါ (သို့မဟုတ်) နှစ်ခါစာသာ ပေးနိုင်တယ် လို့ သူက ဆက်ပြောပါတယ်။
လိုအပ်တဲ့ အခြေခံဆေးဝါးမရှိတဲ့အခါမျိုးမှာ ရှိတဲ့ဆေးဝါးတွေနဲ့ အဆင်ပြေသလို ကုသပေးရတာလည်းရှိတယ်လို့ ဆိုပါတယ်။
“ခုချိန် ရောဂါအခြေနေဆိုလည်း ကလေးကစ လူကြီးထိ ခေါင်းမူးတယ် ခေါင်းကိုက်တယ် အန်တယ် အများအားဖြင့် ကြုံတွေ့နေရတယ်ပေါ့နော။ ဝမ်းပျက်တာတို့ ကြုံတွေ့နေရတော့ ဓာတ်ဆားတို့ ဝယ်လို့လည်း မရဘူး နောက်ပြီး ပုလင်းကြီးတွေလည်း ဝယ်လို့လည်းမရဘူး။ နောက်ဆုံးတော့ ကျမတို့လည်း တတ်နိုင်သလောက် ဆားနဲ့ သကြားတို့ ဓာတ်ဆားရဲ့ အရသာ ပုံစံဖျော်နည်းကို သူတို့ကို သင်ပေးပြီး သောက်ခိုင်းတယ်ပေါ့” လို့ ဆေးကုသမှုဆောင်ရွက်ပေးနေတဲ့ ဆရာမတစ်ဦးက ဆက်ပြောပါတယ်။
လက်ရှိအချိန်ထိ ကရင်နီပြည်တွင်းကို ဝင်ရောက်လာနိုင်မယ့် ကုန်စည်လမ်းကြောင်းတွေကို အသုံးပြုလို့မရသေးတာကြောင့် ဆေးဝါးအပြင် ကုန်ပစ္စည်းတွေ စီးဆင်းမှုမရှိတာ တလ ဝန်းကျင်ရှိနေပြီလို့ ဒေသခံတွေက ပြောပါတယ်။ ဒါ့အပြင် ဖယ်ခုံမြို့နယ်အတွင်းမှာလည်း တိုက်ပွဲဖြစ်ပွားနေတဲ့အပြင် စစ်ကောင်စီရဲ့ စစ်ဆေးရေးဂိတ်တွေကြောင့် ဆေးဝါး ၊ ဆန် နဲ့ တခြားကုန်ပစ္စည်း သယ်ယူဖို့ ခက်ခဲနေတာဖြစ်ပါတယ်။
