ဒီးမော့ဆိုအရှေ့ဖက်ခြမ်းရှိ ကိုယ်ထူကိုယ်ထကျောင်းတွေမှာ သင်ထောက်ကူပစ္စည်းလိုအပ်

ကန္တာရဝတီတိုင်း(မ်)

ကရင်နီပြည် ဒီးမောဆိုမြို့နယ် အရှေ့ဖက်ခြမ်းရှိ ကြားကာလကိုယ်ထူကိုယ်ထကျောင်းတွေမှာ သင်ထောက်ကူပစ္စည်းတွေ စာရေးကိရိယာတွေ လိုအပ်ချက်တွေရှိနေတယ်လို့ သင်ကြားပေးတဲ့ ကျောင်းဆရာမတွေဆီကနေ သိရပါတယ်။

ဒီးမောဆို အရှေ့ဖက်ခြမ်း ကိုယ်ထူကိုယ်ထကျောင်းမှ ဆရာတစ်ဦးက

“အခက်ခဲကတော့စာအုပ်ပါပဲ။ လောလောဆယ်ကတော့စာအုပ်ကမရှိဘူးလေ။ ပုံနိပ်စာအုပ်တို့ သင်ထောက်ကူတို့ဆိုမလုံလောက်ဘူး။ ကျွန်တော်သင်တဲ့ Grade (7)ဆို စနစ်သစ်မှာနော်။ အဲ့မှာ သင်ထောက်ကူလုံးဝမရှိဘူး။” လို့ဆိုပါတယ်။

သင်ထောက်ကူပစ္စည်းတွေမရှိတဲ့အတွက် စက္ကူကို ကတ်ကြေးနဲ့ဖြတ်ညှပ်ကပ်လုပ်ကာ သင်ထောက်ကူပစ္စည်းအဖြစ် အသုံးပြုရတယ်လို့ ဆိုပါတယ်။

လာရောက်လှူဒါန်းတဲ့ အဖွဲ့အစည်းတွေရှိပေမယ့် လုံလောက်မှု မရှိသေးဘူးလို့ ဒီးမော့ဆိုမြို့နယ် အရှေ့ဖက်ခြမ်းက ကျေးရွာတစ်ခုမှာ စစ်ဘေးရှောင်ရင်း ကိုယ်ထူကိုယ်ထကျောင်းမှာ စာသင်ပေးနေတဲ့ CDM ဆရာမတစ်ဦးကခုလိုပြောပါတယ်။

“ကျောင်းသားအနေနဲ့ကတော့ လုံလောက်မှုမရှိဘူး ကျမတို့ရသလောက်လေးနဲ့ ကလေးတွေကို ဝေထားတာတော့ရှိတယ်။ စာရေးကိရိယာ ခဲတံတို့ ဘာတို့လည်း လိုအပ်မှုရှိနေသေးတယ်ပေါ့။”လို့ ဆရာမက ပြောပါတယ်။

ကရင်နီပြည်နယ်ရှိ ကလေးတိုင်း ပညာရေးစနစ်ကိုလက်လှမ်းမီနိုင်ဖို့က KSCCရဲ့ပညာရေးလမ်းစဉ်ထဲမှာပါဝင်ပေမယ့် ဆရာ/ဆရာမ တွေရဲ့ လစာ၊သင်ထောက်ကူပစ္စည်း နဲ့ သင်ကြားတဲ့စာသင်ခန်းတွေကို အပြည့်အဝ ပံ့ပိုးပေးနိုင်ခြင်းမရှိသေးဘူးလို့ ကရင်နီပြည်နယ်တိုင်ပင်ခံကောင်စီ (KSCC)မှ ကိုဗညားကခုလိုပြောပါတယ်။

“ကျနော်တို့အနေနဲ့ ဆရာ၊ ဆရာမတွေရဲ့ လစာဖြစ်စေ ကျောင်းသင်ထောက်ကူပစ္စည်းဖြစ်စေ အအောက်အဦးဖြစ်စေ အားလုံးကို ကျနော်တို့က ပံ့ပိုးမှု ပုံစံမျိုးမရှိနိုင်တာအမှန်ပဲ။ အဲ့ဒါတော့ အမှန်တရားကို လက်ခံခြင်းဖြစ်တယ်။” ကရင်နီပြည်နယ်တိုင်ပင်ခံကောင်စီ (KSCC)မှ ကိုဗညားကခုလိုပြောပါတယ်။

အာဏာသိမ်းပြီးနောက်ပိုင်း ကရင်နီပြည်နယ်က မြို့နယ်အသီးသီးမှာ စစ်ဘေးရှောင်ဦးရေ နှစ်သိန်းဝန်းကျင်ရှိနေပြီး စစ်ရှောင်စခန်းနဲ့ ကျေးရွာတွေမှာ KSCC ပညာရေးလက်အောက်မှာ ကြားကာလပညာသင်ကြားနေတဲ့ ကျောင်းပေါင်း ၃၀၀ကျော်ရှိတယ်လို့ သိရပါတယ်။

ကယားပြည်နယ်လုံးဆိုင်ရာ အခြေခံပညာ ဆရာများသမဂ္ဂ အနေနဲ့ မိမိတို့ပြည်နယ်ရှိ ကလေးသူငယ်တွေရဲ့ ပညာသင်ကြားခွင့်မဆုံးရှူံးရေး၊ အသက်အရွယ်နဲ့ ကိုက်ညီတဲ့ အတန်းကူးပြောင်းခွင့် အာမခံချက်များရရှိရေးတို့ကို မြေပြင်မှာ ဆောင်ရွက်ပေးလျက်ရှိပါတယ်။