စိုးထိုက်အောင်
ကယားတစ်ပြည်နယ်လုံး တက္ကသိုလ်ဝန်တန်းစာမေးပွဲကို ဒုတိယအဆင့် အောင်မြင်ဖြေဆိုခဲ့သူ မတွယ်တာနိုင်ကတော့ သူမ ဝါဿနာပါတဲ့ နိုင်ငံခြားဘာသာတက္ကသိုလ်ကို တက်ဖို့ စိတ်ကူးထားပြီးဖြစ်ပါတယ်။
“ ဝါသနာပါတဲ့ ဘာသာစကားပဲ ဆက်လုပ်ဖို့စဉ်းစားထားပါတယ်။ နိုင်ငံခြားဘာသာတက္ကသိုလ်လျှောက်ဖို့စီစဉ်ထားပါတယ်။”
သူမကတော့ တက္ကသိုလ်ဝင်တန်းစာမေးပွဲကို မြန်မာ၊ သင်္ချာ၊ ဓာတု၊ ဇီ၀ ဘာသာရပ်တွေမှာဂုဏ်ထူးရရှိခဲ့ပြီး အမှတ်ပေါင်း ၄၆၉မှတ်နဲ့ပြည်နယ်မှာ ဒုတိယအမှတ်အများဆုံး ဖြစ်တယ်လို့ ၂၀၂၀ခုနှစ်၊ တက္ကသိုလ်ဝင်စာမေးပွဲ အမှတ်အများဆုံးရရှိသူစာရင်း (သိပ္ပံဘာသာတွဲ)မှာဖော်ပြထားပါတယ်။
သူမနေတာကတော့ ဒီးမော့ဆိုမြို့နယ်၊ ငွေတောင်ကျေးရွာအုပ်စု ရွှေဘုန်းပွင့် ရပ်ကွက်မှာ နေထိုင်ပြီး ၂၀၁၉-၂၀၂၀ပညာသင်နှစ်မှာ အ.ထ.က(၂) ငွေတောင်ကျောင်းမှ တစ်နှစ်ထဲနဲ့ ၄ဘာသာဂုဏ်ထူးနဲ့ အောင်မြင်ခဲ့တာဖြစ်ပါတယ်။
တက္ကသိုလ်ဝင်တန်းစာမေးပွဲပြီးကတည်းက သူမဝါသနာပါတဲ့ နိုင်ငံခြားဘာသာတက္ကသိုလ်ကို တတ်ရောက်ဖို့အတွက်လက်လှမ်းမှီသလောက် Online Class ၊ အုပ်တွေဝယ်ပြီးဖတ်တာတွေကို ပြုလုပ်နေတာဖြစ်ပါတယ်။
“ အောင်စာရင်းထွက်ပြီးမှပေါ့နော်။ အစကလည်း မမှန်းထားဘူး၊ မှန်းပြီးတော့လုပ်တာလဲ မဟုတ်ဘူးပေါ့နော်။ အမှတ်ကောင်းဖို့၊ စာသေသေချာချာလုပ်ဖို့ အဲ့တိုင်းပဲစဉ်းစားထားပြီးတော့ ၁၀တန်းကို ဖြေခဲ့တာပေါ့နော်။ အောင်စာရင်းထွက်တော့ အဲ့အောင်စာရင်းထွက်တဲ့ညမှာ ပြည်နယ်အဆင့်တွေတက်လာတာပေါ့နော်။ အဲ့ခါက ကိုယ့်နာမည်ပါတော့ အဲ့လည်း အံ့သြတယ်။ ဝမ်းလည်း ဝမ်းသာပါတယ်။”
သင်ကြားမှုအပိုင်းမှာ ဘာသာရပ်တိုင်းကို သေချာ လေ့လာမှတ်သားတဲ့အခါမှာ အဓိက ဆရာ/မတွေသင်ကြားတဲ့အချိန် အားရုံစူးစိုက်မှတ်သားထားတဲ့အတွက်လည်း အခုလို အောင်မြင်လာခဲ့တာလို့ဆိုပါတယ်။
“ သင်ကြားမှုအပိုင်းကတော့ ဘာသာရပ်တိုင်းမှာ ဆရာ/မ အားလုံးကသေသေချာချာလည်းသင်ပေးတယ်။ အခုမေးခွန်းပုံစံပြောင်းထားတဲ့ဟာဆိုရင်လည်းနှစ်စကနေပြီးတော့ အမြဲတန်း၊ စာမေးပွဲဖြေခါနီးရော အကုန်လုံးသေသေချာချာပြောပြတယ်။ အမှားဆိုရင်လည်း ဘယ်နေရာမှားတယ်ဆိုပြီးတော့ သေသေချာချာထောက်ပြတယ်ပေါ့နော်။ ဘာသာရပ်တိုင်းကို သေသေချာချာသင်ပေးတယ်။”
သူမကတော့ ငယ်ငယ်ကတည်းက ကျန်းမာရေးမကောင်းတဲ့အတွက်ကြောင့် ကျောင်းကို ပုံမှန်မတတ်ခဲ့ရပေမဲ့လည်း ငယ်ငယ်ကတည်းက ပညာရေးထူးချွန်ဆုတွေကိုမကြာခဏရရှိခဲ့သူလည်း ဖြစ်ပါတယ်။ ဆယ်တန်းကိုတတ်ရောက်နေတဲ့အချိန်မှာလည်း ကျန်းမာရေးမကောင်းတဲ့အတွက်ကြောင့်ကျောင်းပုံမှန်မတက်ပဲ အပြင်ကနေပဲစာကိုလေ့လာရတာဖြစ်ပါတယ်။ စာကို ည ၁၁နာရီလောက်အထိကျက်ပြီး မနက်ဆိုရင် ကျောင်းမသွားခင် ၅နာရီလောက်ကနေစပြီးကျက်တာဖြစ်ပါတယ်။
မိသားစု (၅)ဦးရှိပြီး သူမမိဘတွေကတော့ စိုက်ပျိုးရေး၊ အရောင်းအဝယ်တွေလုပ်ပြီးမိသားစု စားဝတ်နေရေးကို အဆင်ပြေအောင်လုပ်နေရတာဖြစ်ပါတယ်။ မိသားစုက စီးပွားရေးမှာအတော်အသင့် အဆင်ပြေကြပြီး ကလေးရဲ့ပညာရေးပိုင်းမှာလည်း အားပေးမှုတွေရှိတာဖြစ်ပါတယ်။ မိဘတွေကတော့ မတွယ်တာနိုင်ကို အိမ်မှာ အိမ်မှုကိစ္စတွေကို အရမ်းမလုပ်ခိုင်းပဲနဲ့ ပညာရေးဘက်မှာပဲ ဦးစားပေးထားတယ်လို့သိရပါတယ်။
“ ကိုယ့်ကိုလည်း အနားပေးရတယ်၊ ဦးနှောက်ကိုလည်းအနားပေးရတယ်။ ပြီးရင်ကျောင်းက ဆရာ/မတွေရဲ့စကားကိုရောနားထောင်၊ ဆုံးမတာတွေရော၊ သင်ပြပေးတာတွေရော။ ၁၀တန်းက ဘဝတစ်ခုလုံးတော့မဟုတ်ပေမဲ့ပေါ့နော် တစ်ဆစ်ချိုးပြောင်းလဲတဲ့နေရာတော့ ပါတယ်ပေါ့။ တစ်ချိန်ချိန်နောက်ပြန်ကြည့်ရင် ဒါကကောင်းတဲ့ အမှတ်တရာဖြစ်တယ်။ ပြီးရင် ၁၀တန်းမှာ ထူးထူးချွန်ချွန်နဲ့အောင်လို့အခွင့်အလမ်းကောင်းတွေလည်း သေချာပေါက်ရပါတယ်။”
အခုချိန်မှာတော့သူမ တက္ကသိုလ်ဆက်တက်ဖို့ အချိန်စောင့်ရင်း အင်္ဂလိပ်စာ၊ ကိုးရီးယာ၊ ဂျပန် ၊ တရုတ်စာတွေကို အွန်လိုင်းကနေ လေ့လာနေပါတယ်။
၂၀၁၉-၂၀၂၀ခုနှစ် ကယားပြည်နယ်တွင် တက္ကသိုလ်ဝင်တန်းစာမေးပွဲကိုဖြေဆိုသူကျောင်းသူ/သားပေါင်း ၇၉၀၆ ဦးရှိပြီး အောင်မြင်သူဦးရေ ၂၃၄၀ဦးရှိပါတယ်။ တစ်ပြည်နယ်လုံးအတိုင်းအတာနဲ့အောင်ချက်ရာခိုင်နှုန်း ၂၉.၆၀ ရှိပါတယ်။
