ကန္တာရဝတီတိုင်း(မ်)
ကရင်နီပြည်မှာ ၂၀၂၃ခုနှစ် ဖေဖော်ဝါရီ (၂၈)ရက်နေ့အထိ နှစ်လအတွင်း စစ်ရှောင်အပါအဝင် အရပ်သားပြည်သူ (၁၉) ဦးအထိ သေဆုံးမှုရှိတယ်လို့ မတ်လ (၁)ရက်နေ့ တိုးတက်သောကရင်နီပြည်သူ့အင်အားစု PKPF ရဲ့ ထုတ်ပြန်ချက်အရ သိရပါတယ်။
အရပ်သား(၁၃)ဦး နဲ့ စစ်ရှောင်နေစဉ်သေဆုံးသူ (၆)ဦး တို့ ဖြစ်ကြပြီး စစ်ကောင်စီပစ်ခတ်တဲ့ လက်နက်ကြီး ထိမှန်မှုကြောင့် သေဆုံးရတာ အများစုဖြစ်တယ်လို့ PKPF တာဝန်ရှိသူတစ်ဦးက ပြောပါတယ်။
“ ဒီ ၁၃ယောက်ကတော့ အများအားဖြင့် စစ်ကောင်စီလက်နက်ကြီး ရမ်းသမ်းပစ်ခတ်လို့ သေတာပေါ့နော။ ကျန်တဲ့ဟာတော့ စစ်ကောင်စီဖမ်းဆီးသတ်ဖြတ်တာတွေရယ် အဲ့တာတော့ တစ်ယောက် နှစ်ယောက်ရှိတယ်ပေါ့။ အဓိကတော့ လက်နက်ကြီးထိမှန်ပြီးသေဆုံးတာတော့ များတယ်ပေါ့။ “ လို့ သူက ပြောပါတယ်။
ဖေဖော်ဝါရီလ (၂၇)ရက် တစ်နေ့တည်း စစ်ကောင်စီလက်နက်ကြီး ပစ်ခတ်မှုကြောင့် ဒီးမော့ဆိုမြို့နယ်မှ အရပ်သား ပြည်သူ ၂ဦး သေဆုံးပြီး ၆ဦး ဒဏ်ရာရခဲ့ပါတယ်။ အလားတူ ဖယ်ခုံအခြေစိုက် စစ်ကောင်စီတပ်ကနေပြီး လက်နက်ကြီး ပစ်ခတ်မှုကြောင့် မိုးဗြဲ၊ ဖယ်ခုံ အနောက်ဖက်ခြမ်း ကျေးရွာတွေအတွင်း လက်နက်ကြီး ကျရောက်ခဲ့ပြီး ပြည်သူ ၂ဦး ထိခိုက်ဒဏ်ရာရခဲ့ပါတယ်။
တိုက်ပွဲဖြစ်ပွားခြင်းမရှိဘဲအရပ်သား ပြည်သူရှိရာနေရာတွေကို လက်နက်ကြီးပစ်ခတ်မှုလုပ်ဆောင်တာက စိတ်ဒဏ်ရာရအောင် ခြိမ်းခြောက်မှုတစ်ခုဖြစ်တယ်လို့ ဒီးမော့ဆိုပြည်သူ့ကာကွယ်ရေးတပ် ပြန်ကြားရေးတာဝန်ရှိသူတစ်ဦးက ပြောပါတယ်။
“ တိုက်ပွဲထဲမှာ ပစ်တယ်ဆိုရင်တော့ သူပစ် ကိုယ်ပစ်လို့ ကိုယ့်ရဲဘော်တွေထိရင် ကိုယ်ဝမ်းနည်းပေမယ့် ဒါကတော့ ခံသာသေးတယ်။ ဖြေသိမ့်လို့ ရတယ်။ အခုက တိုက်ပွဲမရှိပဲနဲ့ ဒီလိုမျိုး ရမ်းသမ်းပစ်တယ်။ တမင်ရည်ရွယ်ချက်ရှိရှိပစ်တယ်လို့ ကျနော်တို့ သတ်မှတ်လို့ရတယ်ပေါ့နော။ ပြည်သူကို စိတ်ဒဏ်ရာရအောင် နောက်ပြီးတော့ ခြိမ်းခြောက်အောင်ပေါ့နော။ “ လို့ သူက ပြောပါတယ်။
ကန္တာရဝတီတိုင်း(မ်)ရဲ့ လက်လှမ်းမှီတဲ့ စာရင်းအရ ဖေဖော်ဝါရီ တစ်လအတွင်း ရှမ်း-ကရင်နီနယ်စပ်နဲ့ ကရင်နီပြည်မှာ စစ်ကောင်စီရဲ့ လက်နက်ကြီး ပစ်ခတ်မှုကြောင့် ပြည်သူ ၃ဦး သေဆုံးပြီး ၂နှစ်ခွဲကလေးငယ်အပါအဝင် ပြည်သူ ၁၁ဦး ထိခိုက်ဒဏ်ရာရရှိခဲ့ပါတယ်။
မတ်လ ၁ ရက်နေ့ PKPFရဲ့ ထုတ်ပြန်ချက်အရ အာဏာသိမ်းကာလအတွင်း ၂၀၂၁ခုနှစ် ဖေဖော်ဝါရီလ ၁ ရက်နေ့မှ ၂၀၂၃ဖေဖော်ဝါရီ ၂၈ရက်နေ့အထိ စစ်ရှောင်ရင်းသေဆုံးရသူအပါအဝင် ကရင်နီပြည်မှာ အရပ်သားသေဆုံးသူ (၄၃၉)ဦး ရှိတယ်လို့ သိရပါတယ်။
