ကန္တာရဝတီတိုင်း( မ် )
လွိုင်ကော်မြို့ ပီးကင်းကောခူကျေးရွာမှာ ယနေ့ အောက်တိုဘာလ ၂၆ရက်နေ့ နေ့လည် ၁၂နာရီခွဲအချိန်မှာ လက်နက်ကြီးကျပြီး စက်ဘီးစီးကစားနေတဲ့ အသက် ၅နှစ်အရွယ် ကလေးငယ်တစ်ဦးသေဆုံးသွားခဲ့ရသလို အနီးအနားမှာရှိနေတဲ့ အရပ်သား ၃ဦးလည်း ထိခိုက်ဒဏ်ရာရခဲ့တယ်လို့ ကယန်းလူငယ် ကယ်ဆယ်ရေးပရဟိတအသင်းဝင်တစ်ဦးက ပြောပါတယ်။
ထိခိုက်ဒဏ်ရာရသူတွေထဲ အသက် ၁၀နှစ်အရွယ်နဲ့ ၁၃နှစ်အရွယ်ကလေးတွေလည်းပါဝင်ပြီး ၁၃နှစ်အရွယ်တစ်ယောက်ကတော့ စိုးရိမ်ရတဲ့ အခြေအနေရှိတယ်လို့ သူကပြောပါတယ်။
“ကလေးနံဘေးတည့်တည့်မှာကျတယ်။ ဆုံးသွားတဲ့ကလေးက စက်ဘီးမောင်းရင်းနဲ့ ကလေးနံဘေးမှာ စုတ်စုတ်ပြတ်ပြတ်ပေါ့နော။ စက်ဘီးကလည်းတအားပျက်စီးသွားတယ်။ ကလေးလည်း တော်တော်လေးဆိုးသွားတယ်ပေါ့ အဲမှာ ကလေးနံဘေးမှာပဲကျတယ်ပေါ့။ နောက်ကျန်တဲ့ တစ်ယောက်ကတော့ ကျန်တဲ့လူတွေကတော့ ဒီသူတို့နဲ့ နည်းနည်းဝေးတဲ့နေရာမှာပေါ့နော။ အထိအခိုက်ကတော့ တစ်ယောက်ကတော့ ၁၃နှစ်တစ်ယောက်ကတော့ ဒဏ်ရာတော့ တော်တော်ပြင်းထန်တာပေါ့နော။ အဲ့ပုံစံပေါ့။ သူတို့က လမ်းလျှောက်ရင်းနဲ့ပေါ့။” လို့ ၎င်းက ပြောပါတယ်။
လက်နက်ကြီးပစ်ခတ်မှုဟာ မည်သည့်တပ်က မည်သည့်အကြောင်းအရင်းကြောင့် ပစ်ခတ်တယ်ဆိုတာကိုတော့ သီးခြားအတည်ပြုနိုင်ခြင်းမရှိသေးပါဘူး။
တချိန်တည်းမှာပဲ ဝါရီကောခူကျေးရွာက အရပ်သားတစ်ဦးဟာလည်း လက်နက်ကြီးထိမှန်ဒဏ်ရာရတာတွေ ရှိတယ်လို့ ကယန်းလူငယ် ကယ်ဆယ်ရေးပရဟိတအသင်းဝင်တစ်ဦးက ဆက်ပြောပါတယ်။
လက်ရှိမှာ ထိခိုက်ဒဏ်ရာရသူတွေကို လွိုင်ကော်ဆေးရုံကြီးကို ဆေးဝါးကုသမှုခံယူနိုင်ဖို့ ပို့ဆောင်ပေးထားတယ်လို့ ဆိုပါတယ်။
ဒီကနေ့ အောက်တိုဘာလ ၂၆ရက်နေ့ မနက် ၄နာရီအချိန်မှာလည်း လွိုင်ကော်မြို့ ဝါရီကောခူကျေးရွာအတွင်းက လူနေအိမ်နား လက်နက်ကြီးကျရောက်ခဲ့ပြီး နေအိမ်ထဲက မိသားစုသုံးဦး ထိခိုက်ဒဏ်ရာရခဲ့ပါတယ်။
ပြီးခဲ့တဲ့ အောက်တိုဘာလ ၂၃ရက်နေ့ ည၉နာရီအချိန်မှာလည်း လက်နက်ကြီးပစ်ခတ်မှုကြောင့် ဝါရီကောခူကောခူကျေးရွာနဲ့ မနီးမဝေး ကုန်းသာကျေးရွာစစ်ဘေးရှောင်နေထိုင်တဲ့နေရာမှာ လက်နက်ကြီးကျရောက်ခဲ့တဲ့အတွက် ဇနီးမောင်နှံနှစ်ဦး သေဆုံးခဲ့ရပြီး ကလေးငယ်နှစ်ဦး ထိခိုက်ဒဏ်ရာရခဲ့ပါတယ်။
ဒီကနေ့မှာ နှစ်ဖက်ထိတွေ့ပစ်ခတ်မှုတွေရှိနိုင်တယ်လို့ ဒေသခံတချို့က ပြောဆိုနေကြပေမဲ့ သက်ဆိုင်ရာ ကာကွယ်ရေးတပ်ဖွဲ့တွေက စစ်ရေးတင်းမာနိုင်ပြီး ပြည်သူတွေအနေနဲ့ သတိထားသွားလာကြဖို့ လူမှုကွန်ယက်စာမျက်နှာပေါ်မှာ ဖော်ပြထားကြပါတယ်။
ဒီလိုပစ်ခတ်မှုတွေ လက်နက်ကြီးကျရောက်မှုတွေကြောင့် လွိုင်ကော်မြို့ ကုန်းသာကျေးရွာအုပ်စုနဲ့ အနီးအနားက ကျေးရွာတချို့က အရပ်သားတွေ စစ်ဘေးတိမ်းရှောင်နေရတယ်လို့ သိရပါတယ်။
ကရင်နီပြည်မှာ အောက်တိုဘာလ ၁ရက်နေ့ကနေ ၂၆ရက်နေ့အထိ စစ်ကောင်စီပစ်ခတ်တဲ့ လက်နက်ကြီးထိမှန်ပြီး ဒဏ်ရာရသူ ၁၄ဦးရှိပြီး သေဆုံးသူ ကလေးအပါအဝင် သုံးဦးရှိနေပါတယ်။
