CJ/ကန္တာရဝတီတိုင်း(မ်)
ကရင်နီပြည်၊ ဖရူဆိုမြို့နယ်အတွင်းမှာ စစ်ကြောင်းထိုးနေတဲ့ စစ်ကောင်စီတပ်ဟာ ထီးပေါ်ဆိုကျေးရွာနဲ့ ဒေါးညေးခူကျေးရွာထဲကို သြဂုတ်လ ၁၈ ရက်နဲ့ သြဂုတ်လ ၂၀ ရက်နေ့အထိ လက်နက်ကြီးတွေနဲ့ သုံးရက်ဆက်တိုက် ပစ်ခတ်နေတယ်လို့ ဒေသခံလူထုပြောပြချက်အရ သိရပါတယ်။
” မနေ့က ကျနော်တို့ရွာထဲကျသေးတယ်၊ ဒီကနေ့တော့ ထီးပေါ်ဆိုဘက်မှာ လက်နက်ကြီးကျတယ်၊ ထီးပေါ်ဆို ဆေးခန်းနားဘက်မှာ ပြီးတော့ ကျောင်းနားမှာလည်း ကျတယ်၊ မနေ့ကတော့ ကျနော်တို့ရွာထဲကျတာ လူနေအိမ်အချို့ ပျက်စီးတယ်၊ လမ်းမကြီးဘေးဘက် အိမ်ထိတယ်၊ အိမ်တော့ တော်တော်များများထိတယ် အသေးစိတ်ကိုတော့ သွားကြည့်လို့မရသေးဘူး။ “လို့ ဒေသခံတစ်ဦးက ပြောပါတယ်။
ဖရူဆိုမြို့နယ်ကို ဦးတည်စစ်ကြောင်းထိုးလာတဲ့ စစ်ကောင်စီတပ်ဟာ ဒေသတွင်းကာကွယ်ရေးပူးပေါင်းတပ်တွေနဲ့ သြဂုတ်လ ၂ ရက်နေ့ကတည်းက ထိတွေ့မှုတွေရှိနေတာပါ။
ဖရူဆိုမြို့နယ်အတွင်း နောက်တစ်ကြိမ် ထပ်မံ စစ်ကြောင်းထိုးနိုင်ဖို့ စစ်ရေးလှုပ်ရှားနေတဲ့ စစ်ကောင်စီတပ်ဟာ ကျေးရွာအတွင်း လက်နက်ကြီးတွေနဲ့ ပစ်ခတ်တာမျိုးလုပ်ဆောင်တာဖြစ်တယ်လို့ ဒေသခံတွေက သုံးသပ်ပါတယ်။
စစ်ကြောင်းထိုးနေတဲ့ စစ်ကောင်စီတပ်ကနေ လက်နက်ကြီးတွေနဲ့ ပစ်ခတ်နေသလို ဒီးမော့ဆို ၁၀၂ တပ်ကနေလည်း ပစ်ခတ်မှုတွေရှိနေတယ်လို့ ဒေသခံတွေကပြောပါတယ်။ ပစ်ခတ်မှုတွေကြောင့် ကျေးရွာအတွင်း ဆေးခန်း၊ စာသင်ကျောင်း၊ လူနေအိမ်အချို့ကိုလည်း ထိခိုက်ပျက်စီးခဲ့တယ်လို့ ဒေသခံတွေက ပြောပါတယ်။
