ဖားဆောင်းမြို့နယ် သိမ်းဆည်းခံ လယ်ယာမြေများ ဖြေရှင်းရန် ခက်ခဲနေ

စူးမယ်

ကယားပြည်နယ် ဖားဆောင်းမြို့နယ်တွင် လယ်ယာမြေ သိမ်းဆည်းထားသည့် ပြည်သူများ ပြန်လည်ရရှိရန် အတွက် လုပ်ဆောင်ပေးဖို့ ခက်ခဲကြောင်း ဖားဆောင်းမြို့နယ် အမျိုးသား ဒီမိုကရေစီအဖွဲ့ချုပ်က ဥက္ကဌ က ဦးစိုင်းသန်းရွှေက ပြောသည်။

လယ်ယာမြေသိမ်းဆည်းခံထားရသည့် ပြဿနာကို သိသော်လည်း မြို့နယ် လယ်ယာမြေ စီမံခန့်ခွဲမှု ကော်မတီတွင် မပါဝင်သောကြောင့် လုပ်ဆောင်၍ မရကြောင်း ဆိုပါသည်။

ဦးစိုင်းသန်းရွှေက “ဟိုးအရင်တုန်းက မတ်လမှာ ဖွဲ့ထားတဲ့အဖွဲ့တွေပေါ့။ ဖွဲ့ထားတဲ့အဖွဲ့ကို NLD အာဏာရတဲ့အချိန်မှာ ဖွဲ့တာ မဟုတ်ဘူးလေ။ အဲဒီအချိန်မှာ ဦးလေးတို့က မပါဘူး။ မပါတော့ အလုပ်လုပ်ရတာ တအားခက်တယ်။ သူတို့လုပ်လိုက်တာကိုလည်း မသိဘူး။ လက်ရှိအစိုးရ ဖော်ဆောင်နေတဲ့ လမ်းအတိုင်း လယ်စီနဲ့ လုပ်တဲ့ဟာတွေက မကိုက်တော့ဘူး မကိုက်တော့။ တကယ်အလုပ်လုပ်တာ ဒီ Issue ကို တကယ်သိတာက ဦးလေးတို့လေ။ သိတဲ့ခါကျတော့ အဲကော်မတီမှာ မပါတဲ့ခါကျတော့ လုပ်လို့မရဘူး”ဟု ပြောသည်။

ဖားဆောင်းမြို့နယ်တွင် မြေယာသိမ်းဆည်းခံရမှု ၁၀ရ ကွက် ရှိသည့်အထဲတွင် တချို့မှာ အိမ်ဆောက်နေသောကြောင့် စရင်းထဲတွင် ၉၂ ကွက်သာ ကျန်ကြောင်း ၎င်းက ဆက်ပြောသည်။

လက်ရှိတွင် မြေယာသိမ်းဆည်းခံထားရသည့် ပြည်သူများကို မြေပုံပြန်ဆွဲခိုင်းပြီး စာရင်းပြန်လည်ပြုလုပ်နေကြကာ အစိုးရမှ လျှော်ကြေးပေးရန် အစီအစဉ်ရှိကြောင်း သိရသည်။

ဖားဆောင်းမြို့နယ်မှ မြေယာအသိမ်းခံထားရသည့် ဒေသခံ တစ်ဦးက “ကျနော့် မြေယာကို ၂၀၀၄ ခုနှစ်မှာ လာသိမ်းသွားတာပါ။ ကျနော်က အဲဒီ မတိုင်ခင်ကတည်းက အဲနေရာကို ပိုင်ထားပြီးသား။ ရှင်းလင်းထားပြီးသားပါ” ဟု ဆိုသည်။

ယခင် အစိုးရ အဆက်ဆက်တွင် အကြောင်းအမျိုးမျိုးကြောင့် တပ်မြေအဖြစ် သိမ်းဆည်းခြင်း၊ မြို့ပြ တည်ဆောက်ရန် သိမ်းဆည်းခြင်း၊ စီမံကိန်းအတွက် ဌာနဆိုင်ရာများ၊ ပုဂ္ဂိုလ်လိက ကုမ္ပဏီများ ၊ လုပ်ငန်းရှင်များနှင့် နိုင်ငံတော်စီမံကိန်းများ တည်ဆောက်ရေးအတွက် သိမ်းဆည်းရာတွင် တောင်သူများ၏ လယ်ယာမြေများကို ဆုံးရှုံးသွားခြင်းကို စီစစ်တွေ့ရှိကြောင်း ဘောလခဲမြို့နယ် စောလဖော်ခန်းမတွင် ပြုလုပ်သည့် တွေ့ဆုံပွဲတွင် ဝန်ကြီးချုပ်က ပြောကြားသွားသည်။

ပြည်ထောင်စု သမ္မတ မြန်မာနိုင်ငံတော်အတွင်းရှိ လယ်ယာမြေနှင့် တခြားမြေများ သိမ်းဆည်းခံရမှုများကြောင့် ပြည်သူများ နစ်နာမှု မရှိစေရေးအတွက် မြေသိမ်းသည့် ပြသာနာများကို လျှင်မြန်စွာ ဖြေရှင်းဆောင်ရွက်နိုင်ရန် လယ်ယာမြေနှင့် တခြားမြေများ သိမ်းဆည်းခံရမှုများ ပြန်လည်စီစစ်ရေး ဗဟိုကော်မတီကို နိုင်ငံတော် သမ္မတရုံးရဲ့ ၅ ရက် ၅ လ ၂၀၁၆ ရက်စွဲပါ အမိန့်ကြော်ညာစာအမှတ် ၁၄ / ၂၀၁၆ဖြင့် ဖွဲ့စည်းခဲ့သည်။

ဖားဆောင်းမြို့နယ်တွင် လယ်ယာမြေသိမ်းဆည်းခံရမှု မရှိကြောင်း ဝန်ကြီးချုပ်နှင့် တွေ့ဆုံချိန်တွင် ဝန်ကြီးချုပ်မှ ပြောသည်။

ကရင်နီပြည်တောင်သူလယ်သမားသမဂ္ဂအဖွဲ့၏ ၂၀၁၆ ခုနှစ် ကယားပြည်နယ် မြေယာအချက်အလက်အရ ဖားဆောင်းမြို့နယ်အတွင်းတွင် တခြားသိမ်းဆည်းခံထားရသည့် မြေတချို့မှာ မော်ချီးဒေသဘက်တွင် ရဲထွဋ်ကျော်ကုပ္မဏီမှ မြေယာသိမ်းဆည်းမှု ၇၀၂၄ ဧက ၊ မော်ချီး (၄) ထပ်ကွေ့တွင် ဒုက္ခသည်နေရာပြန်လည်ချထားရေးအတွက် ၆ ဧက ၊ သံလွင်အရှေဘက်ခြမ်းတွင် ကုပ္မဏီမှ ဧက ၇ဝ ရှိသည်ဟု သိရသည်။