ဘိန်းစိုက်တောင်သူများအတွက် အမှန်တရားကို လွှတ်တော်တွင် ပြောခွင့်မရှိဟု လွိုင်ကော်ပြည်သူ့လွှတ်တော်ကိုယ်စားလှယ် ဝေဖန်

ကန္တာရဝတီတိုင်း(မ်)

ဘိန်းစိုက်ပျိုးရာတွင် ဘိန်းစိုက်တောင်သူများက ရဲတပ်ဖွဲ့နှင့် လက်နက်ကိုင်များကို အခွန်းပေးဆောင်ရကြောင်း လွိုင်ကော်ပြည်သူ့လွှတ်တော်ကိုယ်စားလှယ်မှ ပြည်သူ့လွှတ်တော်အစည်းအဝေးတွင် ဝင်ရောက်ဆွေးနွေးပြောဆိုခဲ့ရာတွင် တပ်မတော်သားလွှတ်တော်ကိုယ်စားလှယ်မှ ကန့်ကွက်ပြောဆိုခဲ့ခြင်းနှင့် အဆိုပါ ဆွေးနွေးချက်စကားအချို့အား လွှတ်တော်က ပယ်ဖျက်ခဲ့ခြင်းအပေါ် အမှန်တရားကို လွှတ်တော်တွင် ပြောကြားခွင့် မရှိဟု ၎င်းက ဝေဖန်လိုက်ခြင်း ဖြစ်သည်။

ဩဂုတ် ၁၈ ရက်တွင် ကျင်းပသော ပြည်သူ့လွှတ်တော်အစည်းအဝေးတွင် ဒေါက်တာခင်စည်သူက မြန်မာနိုင်ငံ၌ ဘိန်းစိုက် တောင်သူများအား ဘိန်းမစိုက်ပျိုးဘဲ ဘဝရပ်တည်ရေးနိုင်ငံတော်မှအမျိုးသားရေး တာဝန် အဖြစ် စနစ်တကျစီမံကိန်းများ ချမှတ် အကောင်အထည်ဖော်ပေးရန် အစီအစဉ်ရှိ၊ မရှိ မေးမြန်းရာတွင် မေးခွန်းဖြေကြးသူမှ မတ်တပ်ရပ်ကန့်ကွက်ခဲ့ခြင်း ဖြစ်သည်။

‘‘ဘိန်းစိုက်တောင်သူများက ဒေသဆိုင်ရာအဖွဲ့အစည်းအချို့၊ လက်နက်ကိုင်အဖွဲ့အစည်းများ ဖြစ်ကြတဲ့ ရဲ၊ တပ်မတော်၊ ငြိမ်းချမ်းရေးလက်နက်ကိုင်အဖွဲ့အစည်းများကို များစွာအခွန်ပေးဆောင်ရပါတယ်။ ၎င်းမှတစ်ဆင့် အကျင့်ပျက်ခြစားမှုမြင့်တက်လာ အောင် လုပ်ဆောင်ပေးပြီး တရား ဥပဒေစိုးမိုးရေးမရှိအောင် အားပေးကူညီပါတယ်။ မြန်မာနိုင်ငံရဲ့ တရားဥပဒေစိုးမိုးရေးကို ပြတ် ပြတ်သားသားစိန်ခေါ်မှုတစ်ရပ် ဖြစ်လာပါတယ်’’ ဟု လွိုင်ကော် မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဒေါက်တာခင်စည်သူက ဆွေးနွေးပြောဆိုခဲ့ခြင်း ဖြစ်သည်။

ထိုသု့ိမေးမြန်းပြီး ဝန်ကြီးဌာနက ပြန်လည်မဖြေကြားမီ တပ်မတော်သားလွှတ်တော်ကိုယ်စား လှယ်ဒုတိယဗိုလ်မှူးကြီးမျိုးထက်ဝင်းက မတ်တတ်ရပ်ကန့်ကွက်ခဲ့ ပြီး တပ်မတော်နှင့်ရဲကို အခွန်ပေး ဆောင်ရကြောင်း သုံးနှုန်းခြင်းသည် ပြည်သူကအထင်မြင်လွဲမှား စေနိုင်၍ ယင်းကိစ္စမျိုးရှိပါက အချက်အလက်နှင့်တိတိကျကျ ပြောရန် ပြောကြားခဲ့သည်။

“လွှတ်တော်မှာ အမှန်တရားတောင် ပြောခွင့်မရှိတော့ဘူးလာ။ ပြန်မေးချင်တယ်။”ဟု ဒေါက်တာခင်စည်သူက ကန္တာရဝတီတိုင်း(မ်)သို့ ပြောသည်။

“လွှတ်တော်ဆိုင်ရာ နည်း ဥပဒေ ၁၄၀၊ ၁၄၁ နဲ့မကိုက်ညီတဲ့ အချက်အလက်တွေပါနေလို့ ထပြီးတော့ ကန့်ကွက်တာ။ ကျန်တဲ့ ဟာတော့ ဘာမှ အထွေအထူးမပါ ပါဘူး။ တချို့သုံးသွားတဲ့အသုံးအနှုန်းလေးတွေကို နည်းနည်းထိန်းထိန်းသိမ်းသိမ်း သုံးဖို့ပါပဲ။ အဲဒါလေးထပြီး ကန့်ကွက်တင်ပြတာပါ’’ ဟု တပ်မတော်သားလွှတ်တော်ကိုယ်စားလှယ်က အစည်းအဝေးအပြီး မီဒီယာများကို ဖြေကြားခဲ့သည်။

မေးခွန်းရှင်၏ ဆွေးနွေးမှုကို ပြည်သူ့လွှတ်တော်ဥက္ကဋ္ဌဦးဝင်းမြင့်က စကားသံများရောထွေးနေ ၍ သဲသဲကွဲကွဲမကြားရသော ကြောင့် ပြန်လည်စိစစ်ပြီးဆောင် ရွက်ပေးမည်ဟု ပြောသည်။

ထို့နောက်လွှတ်တော်အစည်းအဝေးကို ဆက်လက်ကျင်းပခဲ့ပြီး မေးခွန်းများမေးမြန်းအပြီး တွင် တပ်မတော်သားကိုယ်စားလှယ်ကန့်ကွက်မှုကို ဦးဝင်းမြင့် က ‘‘ဒီရှင်းလင်းချက်ကို ပြန်ကြည့်တဲ့အခါမှာ လွှတ်တော်ဆိုင်ရာ နည်းဥပဒေ ၁၄၁ မေးခွန်းနှင့်စပ်လျဉ်းတဲ့ စည်းကမ်းချက်နဲ့ ညီညွတ်မှုမရှိတဲ့ ဝါကျနှစ်ကြောင်း တွေ့ရှိရပါတယ်။ ဒီဝါကျနှစ်ကြောင်းကို မသင့်လျော်လို့ ဆက်လည်း မပြောချင်လို့ ဖတ်လည်းမပြတော့ပါဘူး။ ဒီဝါကျနှစ်ကြောင်းကို လွှတ်တော်အနေနဲ့ ပယ်ဖျက်မည်ဖြစ်ကြောင်း အသိပေးပါတယ်’’ဟု ပြောသည်။

ထို့အပြင် ကိုယ်စားလှယ် များအနေဖြင့် လွှတ်တော်ထဲတွင် ဆွေးနွေးချက်များကို တာဝန်ခံရ မည်ဖြစ်ပြီး အချက်အလက်ခိုင်ခိုင် လုံလုံရှိရမည်ကို သတိပြုရန်နှင့် စကားကိုပြီးစလွယ်မပြောစေလိုကြောင်း ဦးဝင်းမြင့်ကပြောသည်။

ဘိန်းစိုက်တောင်သူများ၏ ကြုံတွေ့နေသော အခက်အခဲများကို ဖေါ်ထုတ်ရန်လည်း တာဝန်ရှိသူများမှ လက်တွေ့လက်ဆောင်စေချင်ကြောင်း ဒေါက်တာခင်စည်သူက ကန္တာရဝတီတိုင်း(မ်)ကို ပြောဆိုစဉ် ထည့်သွင်းပြောကြားသည်။
အာဏာပိုင်များမှ ဘိန်းစိုက်တောင်သူများအပေါ် အမြတ်ထုတ်ခေါင်းပုံဖြတ်နေမှုကိုလည်း မကွယ်မပြုသင့်ကြောင်း ပြည်သူ့လွှတ်တော်ကိုယ်စားလှယ်က ထပ်မံဝေဖန်ပြောကြားသည်။

ဘိန်းစိုက်ပျိုးသည့် ဒေသများတွင် လိုအပ်သောစီးပွားရေး ဖွံ့ဖြိုးတိုးတက်ရေးဆိုင်ရာမူဝါဒနှင့် နယ်ပယ်များကို မူးယစ်ဆေးဝါးထိန်းချုပ်ရေးမူဝါဒသစ်၌ ထည့်သွင်းရေးဆွဲထားပြီး ဘိန်းစိုက်ပျိုးခြင်းမှ ရရှိသည့်ဝင်ငွေကို မှီခိုရသည့်ဘဝမှ လွတ်မြောက်၍ အခြားဝင်ငွေရလုပ်ငန်းများကို ဆောင်ရွက်ခြင်းနှင့် မူးယစ်ဆေး ဝါးသားကောင်ဘဝမှ လွတ်မြောက်ရေးတို့ကို မူဝါဒများချမှတ်၍ ဆောင်ရွက်ပေးမည်ဟု ပြည်ထဲရေးဝန်ကြီးဌာန ဒုတိယဝန်ကြီးဗိုလ်ချုပ်အောင်စိုးက လွှတ်တော်အစည်းအဝေးတွင် ဖြေကြားထားသည်။