ကန္တာရဝတီတိုင်း( မ် )
ရှမ်း-ကရင်နီနယ်စပ် မိုးဗြဲမြို့မှာ ပြီးခဲ့တဲ့ ဖေဖော်ဝါရီလ ၁၃ ရက်နေ့ကစပြီး စစ်ကောင်စီဘက်က စစ်ကြောင်းထိုးလာတာတွေ၊ တပ်အပြောင်းအလဲလုပ်တာတွေရှိတဲ့အတွက် နေ့စဉ်နီးပါး ပစ်ခတ်မှုတွေ ဖြစ်ပွားနေတယ်လို့ ကရင်နီအမျိုးသားများကာကွယ်ရေးတပ် ( KNDF ) သတင်းနှင့်ပြန်ကြားရေး တာဝန်ရှိသူ တစ်ဦးက ပြောပါတယ်။
“လက်ရှိမှာတော့ စစ်ကောင်စီကတော့ မြို့ပေါ်မှာတော့ တပ်အင်အားတွေဖြည့်ထားတယ်ပေါ့နော။ ပြီးတော့ လက်ရှိဒီ သူတို့ တိုက်ပွဲဖြစ်နေတဲ့ စက်တော်ကျေးရွာ အဲဒီဘက်မှာတော့ ဟိုဟာ စစ်ကောင်စီတွေက ရှိနေသေးတယ်ပေါ့နော။ ထိတွေ့တိုက်ပွဲတွေကတော့ နေ့တိုင်းဖြစ်တယ်ပေါ့နော။ ဒါပေမယ့် တိုက်ပွဲကြီးကြီးမားမားတော့ မဟုတ်ဘူး။ တိုက်ပွဲအငယ်လေးတွေ။ သူ့ဘက်က ချောင်းပစ်တယ်။ ကိုယ့်ဘက်က ချောင်းပစ်တာတွေတော့ ရှိတယ်ပေါ့နော။” လို့ သူက ပြောပါတယ်။
စစ်ကောင်စီက မိုးဗြဲမြို့ရှိ စက်တော်ရာစေတီ၊ ညောင်ဝိုင်းရပ်ကွက်၊ ဝါရီဆူးပလိုင်ကျေးရွာနဲ့ လွိုင်ကော်မြို့ရှိ ပီကင်းကောခူကျေးရွာ၊ ဆောင်ကန်းကျေးရွာတွေမှာ တပ်စွဲနေရာယူထားတယ်လို့ ဆိုပါတယ်။ စစ်ရေးအရ အချက်အချာကျတဲ့နေရာတွေကို စစ်ကောင်စီက တပ်စွဲပြီး မြို့တွေကို ထိန်းချုပ်ဖို့ကြိုးစားနေတာဖြစ်တယ်လို့ သူက သုံးသပ်ပါတယ်။
ဒီးမော့ဆိုမြို့မှာလည်း တိုက်ပွဲငယ်တွေဖြစ်ပွားနေသလို ရှားတောမြို့နယ်ဘက်မှာလည်း ပြီးခဲ့တဲ့ ၃ရက်ဝန်းကျင်က ပစ်ခတ်မှုတွေလည်း ရှိခဲ့တယ်လို့ ဆိုပါတယ်။
ဖေဖော်ဝါရီလ ၁၉ ရက်နေ့မှာ ဒီးမော့ဆိုမြို့ ကုန်းသာကျေးရွာက စစ်ကောင်စီတပ်စွဲထားတဲ့နေရာတွေကို သွားရောက်တိုက်ခိုက်ခဲ့ပြီး လက်နက်ခဲယမ်းတချို့ကို ရရှိခဲ့တယ်လို့ ကယား(ကရင်နီ)တော်လှန်ရေးတပ်ပေါင်းစု ( KRU ) က ထုတ်ပြန်ခဲ့ပါတယ်။
အလားတူ ဖေဖော်ဝါရီလ ၁၉ ရက်နေ့မှာလည်း ဖယ်ခုံမြို့နယ် ခမရ (၄၂၁) ကင်းပုန်းစခန်းကို KNDF B-11 နဲ့ SSRY တို့ သွားရောက်ပစ်ခတ်ခဲ့တယ်လို့ KNDF B-11 က ထုတ်ပြန်ထားပါတယ်။
ဒါ့အပြင် ဖေဖော်ဝါရီလ ၁၃ ရက်နေ့မှာလည်း ဖယ်ခုံမြို့က စစ်ကောင်စီတပ်စွဲထားတဲ့ ပင်ပုံစခန်းကုန်းတောင်ပေါ်ကို KNDF၊ UAV၊ SSRY တို့ သွားရောက်တိုက်ခိုက်ခဲ့ပြီး နေ့ဝက်ကြာ တိုက်ပွဲဖြစ်ပွားခဲ့တယ်လို့ KNDF B-11 က ထုတ်ပြန်ခဲ့ပါတယ်။
စစ်ကောင်စီတပ်ဟာ ကရင်နီပြည်က မြို့နယ်အချို့ကို စစ်အုပ်ချုပ်ရေးကြေညာပြီးတဲ့နောက်ပိုင်းမှာ စစ်ရေးအရှိန်တွေ ပိုပြီး တိုးမြှင့်ထားတယ်လို့ KNDF သတင်းနှင့်ပြန်ကြားရေး တာဝန်ရှိသူ တစ်ဦးက ဆက်ပြောပါတယ်။
“စစ်အုပ်ချုပ်ရေး ကြေညာပြီးနောက်ပိုင်းပေါ့။ ဒိဖေဖော်ဝါရီလအတွင်းမှာပေါ့။ ဆိုတော့ သူတို့ က ဒီဟာပေါ့နော။ စစ်အင်အားတွေ ပိုပြီးတော့ တိုးချဲ့လာတာပေါ့နော။ ဆိုတော့ ဒီကျနော်တို့ ပြည်နယ်ဘက်ကို ဒါစစ်အင်အားထပ်တိုးတာကို ကျနော်တို့ ကြားသိရတယ်ပေါ့နော။ ဆိုတော့ ဖယ်ခုံဘက်ကနေ သူတို့ စစ်အင်အားကတော့ ကားယာဉ်တန်းတွေကတော့ ဖယ်ခုံဘက်ကို ရောက်နေတယ်လို့ ကျနော်တို့ ကြားသိရတယ်ပေါ့နော။ ဆိုတော့ ဒီဘယ်လိုပြောရမလဲ အရေးပေါ်ကာလကြေညာတဲ့အနေအထားမှာ သူတို့ စစ်ရေးပိုမြှင့်တဲ့ အနေအထားမှာ ကျနော်တို့ တွေ့ရတယ်ပေါ့နော။” လို့ သူက ပြောပါတယ်။
စစ်ကောင်စီဘက်က စစ်ရေးအရှိန်တိုးမြှင့်လာတဲ့အတွက် တိုက်ပွဲအချိန်မရွေးဖြစ်ပွားနိုင်ပြီး အရပ်သားပြည်သူတွေအနေနဲ့ စစ်ရေးအရ အသွားအလာ ကန့်သတ်ထားတဲ့နေရာတွေကို မသွားလာကြဖို့နဲ့ လုံခြုံရေးကို သတိပြုပေးကြဖို့ KNDF က တိုက်တွန်းထားပါတယ်။
