ခွန်းကလိုင်းဖရီး
မူလတန်းအဆင့် ကယန်းတိုင်းရင်းသားစာပေ Grade-1၊ Grade-2နှင့် Grade-3 အတွက် အတန်းလိုက် သင်ရိုးညွှန်းတမ်းသစ်ကို ကယန်းစာပေနှင့် ယဉ်ကျေးမှုဗဟိုကော်မတီမှ ကယန်းတိုင်းရင်းသားစာပေ သင်ရိုးညွှန်းတမ်းရေးဆွဲရေးအဖွဲ့အား ဖွဲ့စည်းပြီး စတင်အကောင်အထည်ဖော် ရေးဆွဲနေသည်။
ယခုလအတွင်း ၄င်းသင်ရိုးညွှန်းတမ်း စာအုပ်ပုံစံအကြမ်းအား ရေးဆွဲရမည်ဖြစ်ပြီး ကယားပြည်နယ်အစိုးရအစိုးရထံ တင်ပြရမည်ဟု ကယန်းတိုင်းရင်းသားစာပေ သင်ရိုးညွှန်းတမ်းရေးဆွဲရေးအဖွဲ့ တာဝန်ရှိသူခွန်းလွှီးစီက ပြောသည်။
အဆိုပါ ကိစ္စနှင့် ပတ်သက်ပြီး ခွန်းလွှီးစီက “လောလောဆယ်က Grade-1 ကနေ Grade 3 အထိကို ဒီလအတွင်း အကြမ်းအားဖြင့် ဆွဲကြပေါ့။ ဆွဲပြီးရင် စီမံချက်တင်ဆိုတဲ့ ပုံစံမျိုးပေါ့နော်။ အဲ့တော့ အစိုးရနဲ့ ယူနီဆက်က တတ်နိုင်တဲ့ ဘတ်ဂျက်နဲ့ ကူမယ်ပေါ့။ အဲလိုပြောတော့ ကျနော်တို့က လုပ်နေတာပါ”ဟု ပြောသည်။
လက်ရှိရေးဆွဲနေသည့် သင်ရိုးညွှန်းတမ်းသည် ယခင်က ရေးဆွဲထားသည့် သင်ရိုးညွှန်းတမ်းအတိုင်း မြန်မာဖတ်စာအုပ်မှ တိုက်ရိုက် ဘာသာပြန်ထားခြင်းမျိုးမဟုတ်ပဲ ကယန်းတိုင်းရင်းသားများ၏ သီးသန့် ့သင်ရိုးပုံစံဖြင့် ရေးဆွဲနေခြင်းဖြစ်သည်။
၄င်းမူလတန်းအဆင့် သင်ရိုးညွှန်းတမ်းထဲတွင် အခြေခံကယန်းအက္ခရာ၊ ကားတွန်းရုပ်ပုံများနှင့် ကယန်းဘာသာဖြင့် အပြန်အလှန်နှုတ်ဆက်သည့် ဝေါဟာရများ ထည့်သွင်းထားကြောင်း ဆိုသည်။
လက်ရှိသင်ရိုးကို သင်ကြားရာတွင် ကလေးများသည် မြန်မာစာတစ်ကြိမ်သင်ထားပြီး ဖြစ်သည့်အတွက် နောက်မှ ကယန်းစာသင်ကြားရသည့်အတွက် ကလေးငယ်များအတွက် ပို၍လွယ်ကူနေကြောင်း အ.မ.က ဒေါငံရောက်ကျေးရွာတွင် ကယန်းစာပေသင်ကြားနေသော ဆရာမဒေါ်ဆိုဖီယာက ပြောပါသည်။
̏အခုသင်ရိုးမှာ ကလေးတွေက သူတို့မြန်မာစာနဲ့ အရင်သင်ရပြီးတဲ့အတွက်ကြောင့် နောက်မှ ကယန်းစာနဲ့ ပြန်သင်ရတော့ သူတို့ပိုရလွယ်တယ်၊ သင်ရိုးသစ်ရေးတဲ့ နေရာမှာလည်း ကယန်းစာကို မြန်မာစာကြောင်းနဲ့ တွဲပေးရင် ပိုကောင်းမယ်လို့ ထင်တယ်˝ဟု ၎င်းကပြောသည်။
လက်ရှိ သင်နေရသည့်ပုံစံသည် အဆင်ပြေသော်လည်း အနည်းငယ် အခက်အခဲရှိနေကြောင်း ၎င်းကဆိုသည်။
ကယားပြည်နယ်ရှိ ကယန်း၊ ကယား၊ ကယော၊ ယင်းတလဲ၊ ကော်ယော်နှင့် ဂေဘားစသည့် ဌာနေတိုင်းရင်းသား (၆) မျိုး၏ တိုင်းရင်းသားစာပေ သင်ရိုးညွှန်းတမ်းသစ်ရေးဆွဲရန်အတွက် ကယားပြည်နယ်အစိုးရမှ ညွှန်ကြားထားသည်။
ပြည်နယ်တွင်းရှိ ဌာနေတိုင်းရင်းသားများ၏ သင်ရိုးညွှန်းတမ်းများကို Grade-1 မှ Grade-9 အထိ ရေးဆွဲရမည်ဖြစ်သော်လည်း ကယန်းတိုင်းရင်းသားစာပေသင်ရိုးသစ်အတွက် ယခုနှစ်တွင် Grade-1 မှ Grade-3 အထိသာ ရေးဆွဲမည်ဖြစ်သည်။
၄င်းသင်ရိုးညွှန်းတမ်းများကို လာမည့် ၂၀၁၉-၂ဝ ပညာသင်နှစ်တွင် သင်ကြားရန်အလားအလာရှိကြောင်း ခွန်းလွှီးစီက ဆိုသည်။
သို့သော်လည်း အဆိုပါ သက်ရိုးညွှန်းတမ်းများကို ရေးဆွဲရာတွင် အခက်အခဲများလည်းရှိနေသည်ဟု ခွန်းလွှီးစီက ” ဆွေးနွေးပွဲတွေ လုပ်လိုရှိရင်လည်း ကိုယ့်အိတ်ကပ်ကိုယ်စိုက်ပြီး လုပ်ကြတယ်။ တကယ်ထိုင်ရေးတဲ့အချိန်မှာ ကိုယ့်အင်အားနဲ့ ကိုယ်ပဲ လုပ်တော့ ငွေရေးကြေးရေးမှာလည်း အခက်အခဲရှိ်တယ်။ နောက်ပြီးတော့ ပညာရှင်ပေါ့။ ကျနော်တို့ ဆွဲတဲ့အချိန်မှာ အထောက်အကူပြုတဲ့ ပုံတွေပဲဖြစ်ဖြစ်၊ ဒီဇိုင်းအပိုင်းဖြစ်ဖြစ်၊ ကျနော်တို့က အဆင်သင့် မရှိတော့ ဆွဲသာဆွဲတာ လိုချင်သလောက် မသွားဘူးပေါ့နော်” ပြောသည်။
၄င်းသင်ရိုးညွှန်းတမ်းသည် ကယားပြည်နယ်အတွက်သာဖြစ်ပြီး ကယန်းလူမျိုးများနေထိုင်သည့် ကျန်ရှမ်းပြည်နယ်၊ ကရင်ပြည်နယ်နှင့် နေပြည်တော်ကောင်စီနယ်မြေတို့တွင် ညွှန်ကြားချက်မထွက်သေးကြောင်း ၄င်းက ဆိုသည်။
ထို့ကြောင့် လက်ရှိရေးဆွဲနေသည့် သင်ရိုးညွှန်းတမ်းသည် ကယန်းတစ်ဒေသလုံးအသုံးပြုနိုင်မည့် သင်ရိုးတစ်ခုဖြစ်လာရန် သင်ရိုးညွှန်းတမ်းရေးဆွဲသူများမှ မျှော်လင့်နေကြသည်။
ကယန်းတိုင်းရင်းသားစာပေအား အစိုးရစာသင်ကျောင်းများတွင် ၂၀၁၂-၁၃ ပညာသင်နှစ်မှ စတင်ပြီး ကျောင်းချိန်ပြင်ပဖြင့် နှစ်စဉ် သင်ကြားခွင့်ရလာခဲ့သည်။
ယခု ၂၀၁၈-၁၉ ပညာသင်နှစ်အတွက် ကယန်းတိုင်းရင်းသားစာပေအား ကယန်းဒေသအတွင်းရှိ အစိုးရကျောင်း (၂၄၀)ကျောင်းတွင် ကယန််းဆရာ၊မ (၃၀၀) ခန့်မှ သင်ကြားပေးနေသည်။
