ကန္တာရဝတီတိုင်း(မ်)
ကရင်နီပြည်၊ လွိုင်ကော်မြို့နယ် အရှေ့ဘက်ခြမ်းက စစ်ရှောင်စခန်းတစ်ခုမှာ ၅နှစ်အောက် ကလေးငယ်တွေ အရေးပြားယားယံပြီး အဖုပိတ်တွေ ထွက်နေတယ်လို့ သိရပါတယ်။
ပြီးခဲ့တဲ့ ဇူလိုင်လ ပထမပတ်မှာ စတင်ဖြစ်ပွားတာဖြစ်ပြီး ကလေးငယ်တွေမှာ ပိုမိုအဖြစ်များသလို လူကြီးပိုင်းတွေလည်း ဖြစ်ပွားတာရှိနေတယ်လို့ စစ်ရှောင်စခန်းကော်မတီဝင် တစ်ဦးက ပြောပါတယ်။
“ဖြစ်တာတော်တော်များတာ ကလေးပိုများတယ်။ လူကြီးက အဲ့လောက်မဟုတ်ဘူး။ ကလေးက အများဆုံးပဲ။ ကလေးဖြစ်တာ ၅ နှစ်အောက် ခပ်များများပေါ့” လို့စ စ်ရှောင်စခန်းရဲ့ ကော်မတီဝင် တစ်ဦးက ပြောပါတယ်။
![](https://www.kantarawaddytimes.org/wp-content/uploads/2024/07/signal-2024-07-09-153742_003-768x1024.jpeg)
အဆိုပါစစ်ရှောင်စခန်းမှာ သိုလှောင်ထားတဲ့ မိုးရေ မသန့်ရှင်းတာကြောင့်အပြင် စစ်ရှောင်တွေရဲ့ အစားအသောက်တွေကြောင့်လည်း ဖြစ်နိုင်တယ်လို့ ဆိုပါတယ်။
“အစောပိုင်း အဖုတက်ပြီးတော့မှ နောက်ဆုံးတော့ အပြင်ထွက်တာမျိုးပေါ့နော်။ ကွဲသွားတာမျိုးပေါ့နော်။ ဒါပေမယ့် အရည်ထွက်သွားတာ အဆီထွက်သွားတာ။ ဒါပေမယ့် သွေးထွက်တာလဲ မဟုတ်ဘူး။ တစ်ဖြေးဖြေးကျယ်လာတယ်။ အဲ့မျိုး တစ်ဖြေးဖြေးကျယ်ကျယ်သွားတာ ကူးတာလား မသိဘူး။” လို့ စစ်ရှောင်တစ်ဦး က ပြောပါတယ်။
လက်ရှိ စစ်ရှောင်စခန်းမှာ အရေးပြားအနာဖြစ်ပွားမှုအပြင် ငှက်ဖျားနဲ့ ဝမ်းပျက်ဝမ်းလျှောရောဂါတွေလည်း ဖြစ်ပွားနေတယ်လို့ သိရပါတယ်။ စစ်ရှောင်စခန်းက ဆေးခန်းမှာ ဆေးဝါးလုံလောက်မှုမရှိတာကြောင့် ရောဂါဖြစ်ပွားသူတွေ တိုးလာမှာကို စစ်ရှောင်တွေက စိုးရိမ်နေကြပါတယ်။