ကန္တာရဝတီတိုင်း(မ်)
ရှမ်း – ကရင်နီနယ်စပ် မိုးဗြဲမြို့ နဲ့ လွိုင်ကော်မြို့ အကြားမှာ တည်ရှိတဲ့ ပီကင်းကောခူ ကျေးရွာထဲကို စစ်ကောင်စီရဲ့ တိုက်ခိုက်မှုကြောင့် တစ်ရက်အတွင်း အရပ်သားပြည်သူ ၅ ဦးသေဆုံးခဲ့တယ်လို့ ဒီကနေ့ ဧပြီလ ၅ ရက်နေ့မှာ ကရင်နီအမျိုးသားများကာကွယ်ရေးတပ် (KNDF) က ထုတ်ပြန်ပါတယ်။
ယမန်နေ့ ဧပြီလ ၄ ရက်နေ့မှာ စစ်ကောင်စီက လက်နက်ကြီး နဲ့ လေကြောင်းဗုံးကြဲ တိုက်ခိုက်ခဲ့တာဖြစ်ပြီး အမျိုးသား ၅ ဦး ထိမှန် သေဆုံးခဲ့တာပါ။
မိုးဗြဲမြို့ အခြေစိုက် ခမရ (၄၂၂) တပ်ကနေ တစ်နေကုန်နီးပါး အကြောင်းမဲ့ လက်နက်ကြီး ပစ်ခတ်ခဲ့ပြီး မနက် (၁၁) နာရီခွဲအချိန်မှာ အမျိုးသားတစ်ဦး လက်နက်ကြီး ထိမှန်ခဲ့တာဖြစ်ပါတယ်။
ဒါ့အပြင် နေ့လည် ၂နာရီကျော်အချိန်မှာလည်း ထပ်မံ လေယာဥ်နဲ့ ဗုံးကြဲခဲ့တာကြောင့် အမျိုးသား ၄ဦး ထပ်မံ သေဆုံးခဲ့ပါတယ်။ စစ်ကောင်စီရဲ့ တိုက်ခိုက်မှုတွေကြောင့် အရပ်သား ၅ ဦး သေဆုံးခဲ့သလို နေအိမ်ပျက်စီးမှုလည်းရှိခဲ့ပါတယ်။
စစ်ကောင်စီဟာ မြန်မာနိုင်ငံတစ်ဝှမ်း ငလျင်ဘေး သင့်နေကြချိန်မှာ ဧပြီလ ၂ရက်နေ့ကနေ မတ်လ ၂၂ရက်အထိ ရက်ပေါင်း (၂၀ ) အပစ်ခတ်ရပ်စဲကြောင်း ကြေညာထားတာပါ။ သို့ပေမယ့် ထုတ်ပြန်ချက် ထုတ်ပြီးတဲ့ချိန်ကစပြီး ကရင်နီပြည်အတွင်းမှာ နေ့စဥ် လေကြောင်းတိုက်ခိုက်မှုတွေကို ဆက်တိုက်လုပ်ဆောင်လျက်ရှိနေတယ်လို့ KNDF က ပြောပါတယ်။
အလားတူ ဧပြီလ ၂ရက်နေ့မှာလည်း ဘောလခဲမြို့နယ် ထူးချောင်းအနီးမှာရှိတဲ့ စစ်ဆေးရေးဂိတ်တခုကို လေကြောင်းတိုက်ခိုက်မှု ပြုလုပ်ခဲ့ပြီး တော်လှန်ရေးတပ်ဖွဲ့ဝင်တစ်ဦးကျဆုံးကာ ထိခိုက်ဒဏ်ရာရသူတွေလည်း ရှိခဲ့ပါတယ်။
မြန်မာနိုင်ငံမှာ ငလျင်ဘေးဒဏ်ကြုံတွေ့ရတဲ့ မတ်လ (၂၈) ရက်နေ့ကစပြီး ကရင်နီပြည်နယ်အတွင်းမှာ စစ်ကောင်စီက လေကြောင်းတိုက်ခိုက်မှု (၃) ကြိမ်တိုင် လုပ်ဆောင်ခဲ့သလို လက်နက်ကြီး ပစ်ခက်မှုလည်း နေ့စဉ်နီးပါးလုပ်ဆောင်လျက်ရှိနေတာကြောင့် လူထုတွေအနေနဲ့ လုံခြုံရေး အသိသတိရှိကြဖို့ကိုလည်း KNDF က တိုက်တွန်းထားပါတယ်။
