ဦးမြာ
ကိုဗစ်ရောဂါဖြစ်ပွားနေတဲ့ အတောအတွင်း စာသင်ကျောင်းတွေကို ပြန်လည်ဖွင့်လှစ်သွားနိုင်ရေးအတွက် ပညာရေးဝန်ကြီးဌာနကနေ စာသင်ကျောင်းတွေကို လိုက်လံစစ်ဆေးမှုတွေပြုလုပ်နေပြီဖြစ်ပါတယ်။
စာသင်ကျောင်းတွေအတွက် ထုတ်ပြန်ထားတဲ့ ကိုဗစ်ကာလအတွင်း လိုက်နာရမယ့် စည်းကမ်းချက် အချက် ၈၀ နဲ့ ကိုက်ညီမှုရှိမရှိကို စစ်ဆေးတာဖြစ်ပါတယ်။
လတ်တလောမှာတော့ စာသင်ကျောင်းတွေရဲ့ ၅၀ ရာခိုင်နှုန်းကို စစ်ဆေးပြီးဖြစ်တယ်လို့ လွိုင်ကော်မြို့နယ် ဒုတိယမြို့နယ်ပညာရေးမှူး ဦးဆူးရယ်ကပြောပါတယ်။
“ အဲ့ဒီအချက်တွေတော့ ကျနော်တို့ လိုက်ပြီးတော့ Check List တော့မလုပ်ရသေးဘူး။ လောလောဆယ်တော့ ကျောင်းပြန်ဖွင့်မယ်ဆိုရင် သူတို့ညွှန်ကြားတဲ့ အချက် ၈၀ ရှိတာပေါ့နော။ အဲ့ဒီအချက်၈၀ ပြည့်မှီအောင် ကြိုတင်ပြင်ဆင်ထားဖို့ အဲ့လိုမျိုးလိုက်ညွှန်ကြားထားတာပေါ့နော။”လို့ ဒုတိယမြို့နယ်ပညာရေးမှူး ဦးဆူးရယ်ကပြောပါတယ်။
စာသင်ကျောင်းတွေကို တစ်ပြိုင်နက် မဖွင့်ဘဲ ရောဂါဖြစ်ပွားမှုနည်းတဲ့ မြို့နယ်တွေ၊ လူဦးရေနည်းတဲ့နေရာတွေ၊ ရွှေ့ပြောင်းနေထိုင်သူနည်းတဲ့နေရာတွေကစပြီး အဆင့်လိုက် စတင်ဖွင့်လှစ်ဖို့ ဆိုတဲ့ အကဲဖြတ်ဆန်းစစ်မှုပုံစံ(Check List) တွေနဲ့ ဖွင့်ဖို့ ၊မဖွင့်ဖို့ကို ဆုံးဖြတ်ရမှာဖြစ်ပါတယ်။
ဒါအပြင် COVID-19 ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီရဲ့ အဆုံးအဖြတ် ကိုလည်းရယူမယ်လို့လည်း သိရပါတယ်။
ပြီးခဲ့တဲ့ ဒီဇင်ဘာလ ၂၉ ရက်နေ့က စာသင်ကျောင်းတွေပြန်လည်ဖွင့်လှစ်နိုင်ဖို့အတွက် အခြေခံပညာဦးစီးဌာနကနေပြီးတော့ ပညာရေးဝန်းကြီးဌာနနဲ့ ကျန်းမာရေးနှင့် အားကစားဝန်ကြီးဌာနတို့ နဲ့ တွေ့ဆုံဆွေးနွေးခဲ့တာပါ။
တွေဆုံမှုအရ ကြိုတင်ပြင်ဆင်မှုတွေပြုလုပ်ပြီး အထက်တန်းကျောင်းတွေကို အရင်ဖွင့်လှစ်ဖို့ သဘောတူထားပေမယ့် ဘယ်အချိန်ဖွင့်လှစ်မှာလဲဆိုတာကိုတော့ မသိရသေးပါဘူး။
ကယားပြည်နယ်မှာ အထက်တန်းကျောင်းနဲ့ ကျောင်းခွဲ စုစုပေါင်း ၅၆ကျောင်းသာရှိပါတယ်။
ပြီးခဲ့တဲ့ နှစ် ဇူလိုင်လ ၂၁ ရက်နေ့က Check List အချက်၈၀ နဲ့ ကိုက်ညီတဲ့ (A) အဆင့်ရ ကယားပြည်နယ်အတွင်းက အထက်တန်းကျောင်း ၁၈ကျောင်းကို ဖွင့်လှစ်ခဲ့ပေမဲ့ ကိုဗစ်ကူးစက်မှုအခြေအနေကြောင့် တစ်လအတွင်း ပြန်ပိတ်ခဲ့ရပါတယ်။