ကေးဒူ ( ကန္တာရဝတီတိုင်း(မ်) )
ကရင်နီပြည် ဒီးမော့ဆိုအရှေ့ဘက်ခြမ်း မှာ စစ်ကြောင်းထိုးလာတဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တို့ တိုက်ပွဲ ပြင်းထန် နေတာကြောင့် ထပ်ဆင့် တိမ်းရှောင်ခဲ့ရတဲ့ စစ်ရှောင်စခန်းတစ်ခုမှာ ဖွင့်လှစ်ထားတဲ့ စာသင်ကျောင်းဟာ ပိတ်ထားလိုက်ရပြီး ပြီးခဲ့တဲ့ ဖေဖော်ဝါရီလ ၁၃ ရက်နေ့မှာ ပြန်လည် ဖွင့်လှစ်နိုင်ခဲ့ပါတယ်။
စာသင်ကျောင်းဟာ ဇန်နဝါရီလ ၂၅ ရက်နေ့ မတိုင်ခင် ကတည်းက ပိတ်ထားရတာဖြစ်ပြီး အချိန်ကာလကြာသွားရင် ကလေးတွေ စာ မေ့ကုန်မှာစိုးရိမ်တာကြောင့် ယခုလို အမြန်စီစဥ်ရတာ ဖြစ်တယ်လို့ စစ်ရှောင်ကော်မတီ တစ်ဦးက ပြောပါတယ်။
” ကလေးတွေလည်း စာမေးပွဲဖြေဖို့ အတွက်ပဲ ကျန်တာကို ကျနော်တို့ စစ်ထပ်ရှောင်ရတော့ ကျောင်းပိတ်တာကြာသွားရင် ကလေးတွေလည်း စာတွေ မေ့ကုန်မယ် ပြီးရင် စိတ်လေကုန်မယ်။ တစ်ဝက်တစ်ပျက်တွေနဲ့ ဖြစ်ကုန်မှာစိုးလို့ ကျနော်တို့ အမြန်ပြန် စီစဥ်ပေးရတဲ့သဘောပေါ့။ အဲ့ကြောင့်မလို့ (၂) ရက်အတွင်းနဲ့ အမြန် ဖြစ်သလိုပဲ ပြောရမယ်ပေါ့နော်။ အဓိက အရိပ်ရရုံလေး ကျနော်တို့ ကျောင်းဆောက်လိုက်တဲ့ သဘော ” လို့ စစ်ရှောင်ကော်မတီ တစ်ဦးက ပြောပါတယ်။
ယခင်က ကျောင်းသား၊ ကျောင်းသူ လူဦးရေ ၃၀၀ ကျော်ရှိတဲ့ စာသင်ကျောင်းဟာ ယခုအချိန် ပြန်လည်ဖွင့်လှစ်ရာမှာတော့ ကျောင်းသားကျောင်းသူ ဦးရေ ၂၅၀ ကျော်ဝန်းကျင်သာ ကျန်တော့တယ်လို့ သူက ဆက်ပြောပါတယ်။
ယခင် စစ်ရှောင်စခန်းမှာ နေတုန်းက အိမ်ခြေ ၁၆၀ ကျော်ရှိပြီး ယခုအခါ ပြန်လည် စုစည်းရာမှာတော့ အကုန်လုံး ပြန်မလာနိုင်ပဲ အိမ်ခြေ ၈၀ ကျော်သာ ကျန်ရှိတော့တယ်လို့ သိရပါတယ်။ အလားတူ တိုက်ပွဲဖြစ်ပွားခဲ့တဲ့ အုပ်စုအတွင်းက ဖွင့်လှစ်ထားတဲ့ စာသင်ကျောင်း အချို့မှာလည်း ယနေ့အချိန်ထိ ပြန်လည်ဖွင့်လှစ်နိုင်ခြင်း မရှိသေးဘူးလို့ သိရပါတယ်။
