ကန္တာရဝတီတိုင်း(မ်)
ရှမ်း-ကရင်နီနယ်စပ် ၊ ဖယ်ခုံမြို့နယ် ၊ ဖယ်ခုံအင်းအရှေ့ဖက်ကမ်းက ကျေးရွာတွေမှာ တိုက်ပွဲဖြစ်ပွားခြင်းမရှိဘဲ ဖယ်ခုံစစ်ကောင်စီအခြေစိုက်တပ်ရင်းကနေ လက်နက်ကြီး ၃ရက်ဆက်တိုက် ပစ်ခတ်နေတာကြောင့် ဒေသခံတချို့တိမ်းရှောင်နေရတယ်လို့ သိရပါတယ်။
ပြီးခဲ့တဲ့ ဒီဇင်ဘာလ ၁၅ ရက်နေ့ကစပြီး ဆက်တိုက်ပစ်ခတ်ခဲ့တာကြောင့် လက်နက်ကြီးကျရောက်တဲ့ ကျေးရွာက ဒေသခံတွေဟာ အနီးအနားက ကျေးရွာတွေမှာ သွားရောက်တိမ်းရှောင်ကြတယ်လို့ ဒေသခံအမျိုးသားတစ်ဦးက ကန္တာရဝတီတိုင်း(မ်) ကို ပြောပါတယ်။ လက်နက်ကြီးပစ်ခတ်တဲ့ စစ်ကောင်စီတပ်ကိုတော့ မသိရှိရဘူးလို့ ဆိုပါတယ်။
“လက်နက်ကြီးကျတာတော့ကြာပြီ။ တချို့ကျေးရွာက ရွာအပြင်ဖက်ပဲကျတယ်။ တချို့ရွာကျတော့ ရွာထဲထိကျတာလည်းရှိတယ်။ ရွာထဲထိ လက်နက်ကြီးကျတဲ့ရွာကျတော့ တချို့က ဘေးရွာတွေပဲ ရှောင်ကြတာရှိတယ်။” လို့ ဒေသခံအမျိုးသားတစ်ဦးက ဆိုပါတယ်။
ဖယ်ခုံအင်းအရှေ့ဘက်ခြမ်းမှာ စစ်ကောင်စီ စစ်ကြောင်းထိုး ဝင်ရောက်တာမရှိပေမယ့် လက်နက်ကြီးထိမှန်မှာကို ဒေသခံတချို့က စိုးရိမ်ထိတ်လန့်ပြီး တိမ်းရှောင်နေကြတာပါ။ ပြီးခဲ့တဲ့ နိုဝင်ဘာလ ၂၇ ရက်နေ့က ဖယ်ခုံအခြေစိုက် ခမရ ၄၂၁ တပ်ကနေ ဖယ်ခုံအင်း အရှေ့ဘက်ခြမ်းက ကျေးရွာတွေထဲကို လက်နက်ကြီးပစ်ခတ်မှုကြောင့် ၁လသား ကလေးငယ်တစ်ဦးအပါအဝင် ၆ ဦး ထိမှန်သေဆုံးခဲ့သလို ထိခိုက်ဒဏ်ရာရသူလည်း ရှိခဲ့ပါတယ်။
ဒါ့ကြောင့် ဒေသခံတွေအနေနဲ့ လုံခြုံရေးအခြေအနေအရ ကြိုတင်တိမ်းရှောင်ကြဖို့ စစ်ရှောင်ကူညီသူတွေက တိုက်တွန်းအသိပေးတာလည်းရှိပါတယ်။
“ အရှေ့ဖက်ကမ်းမှာက ရှောင်တဲ့သူကလည်း ရှောင်တယ်။ ကျန်ခဲ့သူလည်း ကျန်တယ်ပေါ့နော်။ လိုင်းပေါ်လည်း တိမ်းရှောင်ကြဖို့ဆိုပြီး ပြောထားတာလည်းတွေ့သေးတယ်။ ဒါပေမယ့် မပြေးတဲ့သူတွေက ပြေးစရာမရှိကြတဲ့အဆုံး အဲ့လိုပုံစံဖြစ်နေတာ။ ထပ်ပြေးစရာ နေရာမရှိတော့ လက်နက်ကြီး ကျရင်တောင် ရွာထဲပဲ ဆက်နေနေရတယ် အဲ့လိုပေါ့။” လို့ အသက် ၂၅ ဝန်းကျင်အရွယ် အမျိုးသားတစ်ဦးက ဆိုပါတယ်။
ဖယ်ခုံ ၊ မိုးဗြဲမြို့အတွင်းမှာ စစ်ကောင်စီတပ်က အင်အားဖြည့်တင်းနေပြီး နယ်မြေစိုးမိုးနိုင်ဖို့ ကြိုးပမ်းနေတာကြောင့် အရပ်သားရှိရာနေရာတွေကို လက်နက်ကြီးပစ်ခတ်မှု ၊ လေကြောင်း နဲ့ ဒရုန်းဗုံးကြဲတိုက်ခိုက်မှုတွေကို နိုဝင်ဘာလကစပြီး ကျယ်ကျယ်ပြန့်ပြန့်လုပ်ဆောင်နေတယ်လို့ တော်လှန်ရေးတပ်ဖွဲ့တွေက ပြောပါတယ်။ ဖယ်ခုံ နဲ့ မိုးဗြဲမြို့မှာ စစ်ကောင်စီအခြေစိုက်တပ်ရင်းတွေဖြစ်တဲ့ ခမရ (၃၃၆) ၊ ခမရ (၄၂၁) ၊ ခမရ (၄၄၂) တပ်တို့ကနေ ကျေးရွာတွေထဲကို လက်နက်ကြီးပစ်ခတ်တာဖြစ်တယ်လို့ ပြောပါတယ်။
