ကန္တာရဝတီတိုင်း(မ်)
ရှမ်းပြည်နယ်တောင်ပိုင်းက မြို့နယ်နဲ့ ကျေးရွာတချို့တွေမှာ စစ်ကောင်စီနဲ့ လက်အောက်ခံ ပြည်သူ့စစ်(PNA)တို့ တစ်လအတွင်း လက်နက်ကြီးအကြိမ်ရေ ၅၄ ကြိမ် ပစ်ခတ်မှုရှိခဲ့ပြီး ပြည်သူ ၃ဦးထိခိုက်သေဆုံးမှုရှိခဲ့တယ်လို့ အင်းလေးဒေသလူ့အခွင့်အရေးလှုပ်ရှားသူတစ်ဦးက ကန္တာရဝတီတိုင်း ( မ် ) ကို ပြောပါတယ်။
“အကြိမ်ရေ အားလုံးက ၅၄ ကြိမ်ပေါ့နော်။ ရေပူကျေးရွာမှာက ၄၇ ကြိမ်ရှိတယ်။ ဘုရားတောင်မှာက ၃ကြိမ် နန်းတုတ်ကျေးရွာမှာက ၄ ကြိမ်ပေါ့နော်။ ဒဏ်ရာရရှိတဲ့ ၁၄ ဦးကတော့ အမည်စာရင်းအသေးစိတ်အခုထိ မရသေးလို့ပါ။” လို့ သူကဆိုပါတယ်။
လက်နက်ကြီးထိမှန်မှုကြောင့် သေဆုံးသူ အသက် ၆နှစ်အရွယ် မိန်းကလေးငယ် တစ်ဦးအပါအဝင် အမျိုးသားနှစ်ဦး စုစုပေါင်း ၃ ဦးရှိတယ်လို့ ဆိုပါတယ်။ ထိခိုက်ဒဏ်ရာရရှိသူ ၁၄ ဦးရဲ့ အသေးစိတ်အချက်အလက်ကိုတော့ မသိရသေးဘူးလို့ ဆိုပါတယ်။
အင်းလေး ဒေသလူ့အခွင့်အရေးလှုပ်ရှားရေးအဖွဲ့က လက်နက်ကြီးကျရောက်ပေါက်ကွဲတဲ့ ကျေးရွာနဲ့ မြို့နယ်တချို့မှာ လက်လှမ်းမီကောက်ယူထားတဲ့ ညောင်ရွှေမြို့နယ် ၊ အင်းလေးဒေသ နဲ့ ပင်လောင်းမြို့နယ် ၊ နန်းတုတ် ကျေးရွာတွေဖြစ်တယ်လို့ ဒီကနေ့ ဖေဖော်ဝါရီ ၃ ရက်နေ့မှာ ထုတ်ပြန်ထားပါတယ်။
ပြီးခဲ့တဲ့ ဇန်နဝါရီ ၂၉ ရက်နေ့မှာလည်း စစ်ကောင်စီနဲ့ ပအိုဝ်းပြည်သူ့စစ် PNA တပ်ဟာ ဖယ်ခုံမြို့နယ်အနောက်ခြမ်းမှာရှိတဲ့ နန်းတောင်း၊ မိုးဦးကျေးရွာကနေ ရေပူကျေးရွာဖက်ကို လက်နက်ကြီး ပစ်ခတ်ခဲ့ရာ ရွာအရှေ့ဖက် ၁၉ လုံးကျရောက်ခဲ့ပြီး ကျေးရွာအတွင်း ၃လုံးကျရောက်ပေါက်ကွဲခဲ့ပါတယ်။ လက်နက်ကြီးကျရောက်ပေါက်ကွဲမှုကြောင့် နေအိမ် တစ်လုံး ထိမှန်ပျက်စီးခဲ့တယ်လို့ သိရပါတယ်။
တစ်လအတွင်း ညောင်ရွှေမြို့နယ် ရေပူကျေးရွာအတွင်း လက်နက်ကြီး ကျရောက်မှု အများဆုံးရှိခဲ့ပြီး တိုက်ပွဲတစုံတရာဖြစ်ပွားခြင်းမရှိသလို အိမ်ခြေ ၈၀ ဝန်းကျင်ရှိတဲ့ ကျေးရွာဖြစ်တယ်လို့ အင်းလေးဒေသလူ့အခွင့်အရေးလှုပ်ရှားသူတစ်ဦးက ပြောပါတယ်။ လက်နက်ကြီးမကြာခဏ ကျရောက်တာကြောင့် ကျေးရွာခံတွေဟာ တခြားနေရာကို ထွက်ပြေးတိမ်းရှောင်နေကြရတယ်လို့ သိရပါတယ်။
