ကန္တာရဝတီတိုင်း(မ်)
“၁ လေးလုံးစစ်ဆင်ရေး”လွိုင်ကော်မြို့သိမ်းတိုက်ပွဲ တစ်နှစ်ပြည့်တဲ့ ဒီကနေ့ နိုဝင်ဘာလ ၁၁ ရက်နေ့၊ မွန်းလွဲပိုင်း ၃နာရီဝန်းကျင်အချိန်ကစပြီး စစ်ကောင်စီတပ်က လွိုင်ကော်မြို့နယ်အတွင်းကို လက်နက်ကြီး ရမ်းသန်းပစ်ခတ်မှုတွေ ပြုလုပ်နေတယ်လို့ ဒေသခံတွေက ပြောပါတယ်။
လွိုင်ကော်မြို့နယ်အနောက်ဘက်ခြမ်းက နိုးကိုးကျေးရွာအုပ်စုအတွင်းမှာ စစ်ကောင်စီပစ်ခတ်တဲ့ လက်နက်ကြီးကျရောက်မှုရှိတာကြောင့် ဒေသခံတွေဟာ လုံခြုံရေးစိုးရိမ်နေကြပြီး တိမ်းရှောင်နေကြတယ်လို့ ဒေသခံအမျိုးသမီးတစ်ဦးက ကန္တာရဝတီတိုင်း ( မ် ) ကို ပြောပါတယ်။
“ပစ်နေတယ်။အခုလည်း ပစ်နေကြတယ်။ ရွာထဲတော့မကျဘူး ရွာအပြင်မှာပေါ့။ တချို့ကြတော့ ရှောင်နေကြတယ်။ ရွာထဲလည်း အများကြီးကျန်နေသေးတယ်။ ကြောက်တော့ အိမ်ထဲပဲ ပုန်းနေရတယ်။ ရှောင်မယ်ဆိုလည်း ဘယ်ကိုထပ်ရှောင်ရမှန်းလည်း မသိတော့ဘူးလေ။”လို့ ဒေသခံအမျိုးသမီးတစ်ဦးက ဆိုပါတယ်။
ယမန်နေ့(နိုဝင်ဘာလ ၁၀ ရက်နေ့) ည ၉ နာရီကျော်အချိန်မှာလည်း နိုးကိုးကျေးရွာအုပ်စုအတွင်း စစ်ကောင်စီပစ်ခတ်တဲ့လက်နက်ကြီး ကျရောက်ခဲ့ပေမယ့် လူထိခိုက်မှုမရှိခဲ့ဘူးလို့ သိရပါတယ်။
နိုဝင်ဘာလ ၈ ရက်နေ့ ၊ ၁၀ရက်နေ့နဲ့ ၁၁ ရက်နေ့တွေမှာ ကျေးရွာအတွင်းနဲ့ အနီးအနားမှာ လက်နက်ကြီးကျရောက်ပေါက်ကွဲမှုရှိတာကြောင့် ဒေသခံတွေအပြင် လာရောက်တိမ်းရှောင်ကြတဲ့ စစ်ဘေးရှောင်တွေဟာ စိုးရိမ်ထိတ်လန့်နေကြရပါတယ်။
“ ဒီနေ့တော့ လွိုင်ကော်မြို့ထဲမှာတော့ ပုံမှန်ပဲပြောရမှာပေါ့။ ညနေပိုင်းမှာတော့ လက်နက်ကြီး ရှယ်ထုပဲ။ ဘယ်ဖက်ကျလဲမသိဘူး လွိုင်ကော်မြို့ထဲကနေပစ်တာဆိုတော့ အသံက အကျယ်ကြီး ကြားနေရတယ်။”လို့ လွိုင်ကော်မြို့ခံတစ်ဦးက ပြောပါတယ်။
ပြီးခဲ့တဲ့ နိုဝင်ဘာလ ၈ ရက်နေ့က လွိုင်ကော်မြို့ထဲကနေ စစ်ကောင်စီ ပစ်ခတ်တဲ့ လက်နက်ကြီး ၇ လုံးထက်မနည်း နိုးကိုးစံပြကျေးရွာထဲ ကျရောက်ပေါက်ကွဲပြီး ၁၀ နှစ်အရွယ်ကလေးတစ်ဦးအပါအဝင် ၄ဦးသေဆုံးပြီး ၃ဦးထိခိုက်ဒဏ်ရာရရှိခဲ့သလို နေအိမ်ပျက်စီးမှုလည်း ရှိခဲ့ပါတယ်။
အဲ့ဒီနေရာမှာ စစ်ဘေးရှောင်တွေ အများစုခိုလှုံနေထိုင်ကြတာကြောင့် ထပ်မံတိမ်းရှောင်ဖို့ အခက်အခဲရှိနေကြတယ်လို့ သိရပါတယ်။
